Read Zeme Naga GETOABELEU 144 Bible Online

GETOABELEU 144 - Zeme Naga bible

GETOABELEU 144

¹A gu tingchutum Tingwang je peize yi lau, herei hang a ba je geteigaipeu, zai a bakêrang ramme hereirabe hangge geteigaipeu zeu;

²pa â a gu tingchutum zai a gu keriengdi lei, pa â a gu keriengdi zai achu ripatpeu lei, pa a gu hinggei zai I ka’nseupeu lei. Pa ne pe kutkang ge ziemmename leine je teiwang gai bei de lei.

³Hei Tingwang gau, ziemmena je ’ndaikau hang pechu nang tinggeu ze bam, makchai ziemmena je ’ndaikau hang pechu nang ’nninghereu ze bam lau?

⁴Ziemmena ze â hechuilu riâ de lei, pe ting ramme â kezuikautatbe riâ de lei,

⁵Hei Tingwang gau, tinggîm kehube deze kebai’mbia gai lu wangkeu lau! Kedeiloa ramme deîtau gai be lau, dezai chiramme mika pat ra hangge zeu!

⁶Tingkepitpelikpat kai ze chiramme ze hûtimrarip ne lau, ning gu bai’mpi tu ramme kappat kai ze penui je tew’ngga kam ne lau!

⁷Kehu ’mbene ning ba getuapat kai ze, hedui kedibe ramme gene, hesangme heluîchimakme ba gene,

⁸penui mui ne karasa-same dagene, zai penui hezat’mbia ba ramme ze choateube hezat’mbia ba chang ze bamme dagene achu meupat kai ze tew’nring gai lau.

⁹Hei Hera gau, heleu karchibe ning dage I tew gu lei; reu kereu ’nrabung tei ze ning dage I kebet gu lei,

¹⁰heguangme je kengambe peipeu, zai Dabidbe ning guâ ka’ngguapeu je meupatkaipeu ningchu zeu.

¹¹Hiazutkie kesiabe gene achu meupat kai lau; zai hesangme heluîchimakme ba gene achu lupat kai lau, penui mui ne karasa sa, zai penui hezat’mbia ba ze choateube hezat’mbia ba changme dageneu.

¹²Anui na rehangme ne penui rîting ge hingbang dipat’mmidibe bang gum ze peize bam lau, anui na ’mpuimi ramme zene â, heguangki gu kemikchia ramme hang tewgailube gum ze peize bam lau;

¹³anui gu ’nseuki ramme peize puigit bam lau, keteu-kesakbe merua zat ramme leine peize bam lau; anui gu meli ramme peize changsenâng anui ram ge ’nnakeu lau,

¹⁴anui gu getumdung ze lung’nsia’ndibe tew mak, nune lung saudibe tew mak ze misongga peize hingpat lau; anui gu puidi ramme ge mi duângga ze ka’nrungbe peize bam se lau!

¹⁵Aigum ’nnamgaibe ramme ngaulume hangge misuiyibe kau de lei! Tingwang ne penui Rapeu chang ze bamme ze misuiyibe kau de lei.