Read Zeme Naga GETOABELEU 145 Bible Online

GETOABELEU 145 - Zeme Naga bible

GETOABELEU 145

¹Ningchu I teichu’ngngu gu lei, a Rapeu Heguang gau, zai betingbeta betun mak ze ning ji I ne ’nnam gai bam gu lei.

²Nai’nsangne ningchu I ’nnam gai gu lei, zai betingbeta betun mak ze ning ji toa bam gu lei.

³Tingwang â tâtewchibe lei, zai pechu â toa’ndirabe lei, pa kedibe tak â mi chîchanglakbe lei.

⁴Rehei kat ne rehei kêdabe dage ning tatew ramme sa’nditat ku lei, zai ning tâ kedibe ramme pau gu lei.

⁵Nang kaheguangbe pengêudi-reba bambe ge, zai ning gu mi ningdaulakbe tâ ramme ge I ’nning bam gu lei.

⁶Ziemmena ne ning gu mi ngauhingbe tâ ramme tâtewchibe deze sarua gu lei, zai I ne nang kedibe tak deze paurua gu lei.

⁷Nang keyibe misongga bambe gu heji keyibe ze penui ne kelatpat kai gu lei, zai ning gu kapelingbe deze penui laîkai ze heleutew gu lei.

⁸Tingwang â mi je hung ze ka’nggiapeu lei, pe lumpum kelua mak, zai hungka’ntipbe ne pui lei.

⁹Tingwang â ’nteumena hang yi lei, zai pe gu ngauka’nggiabe ze â, pa ’ndamgailube leine peireige lamui lei.

¹⁰Hei Tingwang gau, ning tatew ramme leine ne ning dage hesuiyibe sam pau bam gu de lei, zai ning gu ka’nchime ne ningchu ’nnam gai gu de lei!

¹¹Ning gu heguangram ngeudibe rasam ze penui ne sa gu lei, zai ning gu reziechibe rasam sa gu lei,

¹²ziemmename name dage ning gu tatew kedibe ramme, chî ra tewlia gai ra, zai ning gu heguangram pengêudi ze karebabe ze chî ra tewlia gai ra hangge zeu.

¹³Ning gu heguangram â betun mak bam-bambe heguangram de lei, zai ning gu heguang samrambe ze â rehei leine ge bam bam lei. Tingwang â pe sam leine ge lungsangtew ze bam lei, zai pe gu tâtewbe leine ge ka’nggiabe ne pui lei.

¹⁴Tingwang ne kâuderame je teika’nggim lei, zai kei’ngkumkeudime leine je pa ne teichu lei.

¹⁵Hemik leine ne ning lam piezua lei, zai pehî-hî ge penui gu hetak nang ne penui je pei lei.

¹⁶Ning ba ze nang ne latpat kai bei lei, mâ-keringbe leine ne luneibe ze nang ne penui lungwângtewchang gai bei de lei.

¹⁷Tingwang â pe gu tâ’mpuî leine ge kateling lei, zai pe gu tâtewbe leine ge ka’nggia lei.

¹⁸Tingwang â pechu kume leine hangge na ze bam lei, gesang-peling ne pechu kume leine hangge zeu.

¹⁹Pechu hingchime leine gu keneibe ze pa ne tewpui gai lei, penui kehapbe kuâ du pa ne ’ngking gai, zai penui je tew’nringpat kai lei.

²⁰Tingwang ne pechu kehungme leine je reîka’mmi lei; kane helunngriaksiame leine je â pa ne tew’ngga kam gu lei.

²¹A mui ne Tingwang je getoabe rasam sa gu lei, zai ziemmena pum leine ne pe ji ka’nchibe je betingbeta betun mak ze peize ’nnam gai bam lau.