Read Zeme Naga GETOABELEU 147 Bible Online

GETOABELEU 147 - Zeme Naga bible

GETOABELEU 147

¹Tingwang je toa lau! Anui Rapeu je toa ze leutewbe yi de lei; pa â ka’nggiabe ne pui lei, getoabe leu ze â betâu sing de lei.

²Tingwang ne Jerusalem ze tew’nsapchu gai lei; Israelme ruage tuâpat’ndime je pa ne kagekum lei.

³Mi duângga desuipuai bamme lung ze pa ne tewka’mmi lei, zai penui jâm ramme ze dumchim gai lei.

⁴Hegi ramme riak hang pa ne sei gai lei, zai chiramme leine ji hang pa ne ’ntak kai lei.

⁵Tingwang â di-desang lei, zai pe gu rezie ze misongga bam lei; pa ne mâ-gechîbe ze â ’ndeuchi lak lei.

⁶Tewsabe lieme je pa ne teichu lei, helungriaksiame je pa ne kedei ge tuâ gai lei.

⁷Hesuiyibe sam pau ze Tingwang dage leutew zu lau; ’nrabung tei lu ze heruakyibe ramme ne anui Rapeu dage heleutewdiam gai zu lau!

⁸Tingkehube ze pa ne kemâu ne kehingpuiting gai lei, kedei ge ting ruîgairabe hang pa ne teleu gai lei, peloa ramme ge mâ-kiak ramme puakpat ra pa ne tew gai lei.

⁹Mâ-rekaune ramme je penui hetak pa ne pei lei, zai ’nggek poine ramme ’nchiapdiam bambe ramme je penui hetak pa ne pei lei.

¹⁰Pa ne pa’nningsiakbe ze â hekun ranchi ge mak lei, zai pa ne pe suiyibe ze â ziemmena pî ge mak lei;

¹¹kane pechu hingchime dage pa ne pe suiyi lei, pe gu hungka’ntipbe ge mâ-kaheguîme dage zeu.

¹²Tingwang je toa lau, Hei Jerusalem gau! Ning Rapeu je toa lau, Hei Zaion gau!

¹³Pa ne ning gu keriechâp ramme ran tew’nchi gai lei; zai ning zuilung ge ning name bamme je ’nnam gai lei.

¹⁴Pa ne ning gu heramrai lungge desieyibe lungkatemibe tew gai lei; zai dekuîmeu yilangbe ne ningchu kei’nggeu gai lei.

¹⁵Kedeirei ge pe gu samde ze pa ne langpat kai lei; pe sam ze kelua ze gizuaitat lei.

¹⁶Mâ-geûpuâng gum ze pa ne kebun pei lei; timbun gum ze kebun-râ ramme pa ne ’nruk kai lei.

¹⁷Bekâng-kâng tew ze pa ne pe gu kebun kâng tuâpat kai bei lei; pe gu kahegeibe chui ge châu sapchi ra lau?

¹⁸Pa ne pe sam langpat kai lei zai chiramme je tewluapinpat kai lei; pe gu tingkai gui ra pa ne tew gai lei, zai hedui ramme lua ra tew gai lei.

¹⁹Pe sam ze Jakobbe dage rang’nchichiak kai lei, Israel dage pe gu hingde rawdiakkaibe ramme benai hingde tewgaibe ramme rang’nchichiak kai lei.

²⁰Heramzat kêdame peireige aigum ze pa tew gai me lei; pe gu hingde tewgaibe ramme penui â chî mak lei. Tingwang je toa lau!