Read Zeme Naga GETOABELEU 148 Bible Online

GETOABELEU 148 - Zeme Naga bible

GETOABELEU 148

¹Tingwang je toa lau! tinggîm kehu ’mbene Tingwang je toa lau, kehube ramme gene pechu toa lau!

²Pe gu angelme leine ne pechu toa lau, pe gu bamdime leine ne pechu toa lau!

³Hekêu benai tingnaimik gau, pechu toa lau, ningnui ’mbi babe hegi ramme leine gau, pechu toa lau!

⁴Tinggîm hulangbe gau, pechu toa lau, zai tinggîm kehube peireige bambe hedui ramme gau, pechu toa lau!

⁵Peize penui ne Tingwang ji je toa lau! Pa ne die gai bei ze chiramme pat ti daseu.

⁶Zai pa ne chiramme ze betingbeta hangge sum’ntip kai bei de lei; ’ngkapatlakrabe penui gu hede ramme pa ne die gai bei de lei.

⁷Kedeirei gene Tingwang je toa lau, ningnui sungkling ge mârekaune kedibe ramme benai gechukbe ramme leine gau,

⁸hemi benai desak, kebun zai kebunmoine zai pe gu samde tewpuibe heratingkai gau! Tingwang je toa lau!

⁹Kedeiloa ramme benai peloa ramme, mâ-hêrachi bang ramme benai kedarching bang ramme neu!

¹⁰Mâ-rekaune ramme benai kaurui ramme leine, liaruabe kau ramme benai ’nruine liambe ramme leine neu!

¹¹Kedeirei heguangme benai hezat leine, heguangsinme benai kedeirei ge samramme leine neu!

¹²Rehangme benai heleume ’nteumena, gechîngme benai napoine ramme neu!

¹³Peize penui ne Tingwang ji je toa lau, pe ji je runne suang gai ’ndi de lei; pa pe ngeudibe ze â tinggîm benai kedeirei ge lamui lei.

¹⁴Pe gu ziemmename hangge mâkie pa ne getuachu gai ’nde lei, pe gu ziemmena ka’nchime leine hangge toa lau, pe taige bambe Israelme hangge toa lau, Tingwang je toa lau!