Read Zeme Naga GETOABELEU 149 Bible Online

GETOABELEU 149 - Zeme Naga bible

GETOABELEU 149

¹Tingwang je toa lau! Tingwang dage heleu karchibe tew lau, keneime wangka’nduibe ge pechu toabe ge zeu!

²Peize Israel ne pechu tewpeu je pe suiyi lau, peize Zaion name ne penui gu Heguang peireige penui suiyi’nta lau!

³Peize penui je pe ji toa ze lim lau, ’nsum benai ’nrabung tei lu heruakyibe ne pechu leutewdiam bam lau!

⁴Tingwang â pe gu ziemmename peireige pe suiyi daseu; kecheiluîtewme je pa ne kengambe pei gai ze pe ngeutew gai lei.

⁵Peize lungsangtewme ne pengêudibe gene penui suiyi ze ’nsumchai ze bam lau; penui jeî gene peize penui suiyibe leutew lau.

⁶Peize penui ku gene Tingwang je toa’nchi lau, zai penui ba ge hiazutkie mui na lam bambe tei lu peize toa’nchi lau,

⁷heramzatme peireige hekûmtew ra, zai hezat ramme je tewsâ ra,

⁸penui gu heguangme je hegeîria ramme ne pi ze penui gu besuitewme je hegeî’ngkap kap kai ra,

⁹samramrabe sam rawgaibe penui peireige tewpui gai ra hangge zeu. Ai ze â pe gu ziemmena ka’nchime leine hangge pengêudibe de lei. Tingwang je toa lau!