Read Zeme Naga GETOABELEU 17 Bible Online

GETOABELEU 17 - Zeme Naga bible

GETOABELEU 17

¹Ka’nzeibe sam ge ’ngking gai lau, Hei Tingwang gau; I hapbe kuâ ’ngking gai lau! Kechoabe tewmakbe mui gene a gu gekiebe ze ning kun ne ’ngking gai lau!

²A ’nzei teiliabe ning dagene peize wang lau! Ning mik zene ka’nzeibe peize ngau le lau!

³Nang ne a lung ze ’ndeupie dizai â, tingmuî ge nang ne achu ’ngkiâmie dizai â, nang ne achu kedak tizai â, a dage kesia ka’nningbe ze nang ne ngaudau ra mak lei; a mui gene du sam sa ka’nzûbe ga lei.

⁴Ziemmena ne tâtewbe deu ramme ge, ning mui gene sam sapatbe zene tewkakeleume telung tak gene I ’mbia di de lei.

⁵A pikiâm ramme â ning gu ’mpuîki ramme luî kiamtat la lei, a pî kiamgesa me lei.

⁶Hei Hera gau, nang ne achu kak kai ra hangge ningchu I kû lei; a lam ning kun ’ngngiakeu ze a sam ramme ’ngking gai lau.

⁷Ningdaulakbe tak gene ning gu hungka’ntipbe teilia lau, penui je ka’nggime dagene ning ba hezat’mbia ba ge ’nseu gai ra peume gu nang Hei tewka’nringpeu gau.

⁸Nang ’nzâ-kadesangbe zat gum ze achu tei gai lau; ning kan kezuikang ge achu tewtimbai gai lau,

⁹helungriaksiame achu sutme, achu tew’nsia ra guâgit bamme dageneu.

¹⁰Penui â ngau’nggiarabe lung latpat mak lei; penui mui gene penui â kedikuâ-kua lei.

¹¹Penui ne achu peupat lu la de lei; chuna â penui ne achu tuaguâ ’nde lei; achu kedei ge tuâ gai ra penui mik piereking la de lei.

¹²Penui â duilui ne ’ngkîkezit kai nei-desang bambe riâ de lei, zai duilui perîsibe kau ’mbai lu lîmkuabe gum zeu.

¹³Zuachu lau, Hei Tingwang gau! Penui je timpheu lau, penui je keriêtua ne lau! Helungriaksiame dagene achu ning gu hiazutkie ne lupat kai lau,

¹⁴ziemmena penui dam ze Hei Tingwang, ai keringbe ge kedeirei gu zene chang ze bamme dageneu. Deîsarabe hang penui hangge nang gekuagaibe zene peize penui bungpui tewpuiting gai be lau; peize penui name je kegeuga ze bam lau; penui chaname hangge du peize ’ndêupat lau.

¹⁵A hang â I â teling lu ze ning ju pie bam gu lei; I ’nrakchu dezai ning luitak ze I ngau lu ze a lungwângchang bam gu lei.