Read Zeme Naga GETOABELEU 18 Bible Online

GETOABELEU 18 - Zeme Naga bible

GETOABELEU 18

¹Hei Tingwang gau, nang â a ranchi, ningchu I hung lei.

²Tingwang â a gu tingchutum zai a gu keriengdi lei, zai achu ’nripatpeu, a Rapeu, a gu tingchutum, I ka’nseupeu, a gu hinggei zai a gu tewka’nringbe mâkie, zai a gu keriengdi lei.

³Tingwang je I ku lei, toa bam ra buibepeu jeu, zai a teureime dagene achu tew’nring gai bei de lei.

⁴Kechaibe gu heria ramme ne achu gîngguagit kai lei, tew’nggarabe chuichi ramme zene achu chuinup te lei;

⁵Kechaiberam gu heria ramme ne achu mi lei, kechaibe ’mpia ramme achu dau lei.

⁶I a duânggabe ne Tingwang je ku lei; a Rapeu dage peize ’ngngâ gai ra I ka’nrung de lei. Pe gu kellumki gene a kuâ pa seu de lei, zai I ka’nrungbe kuâ pe kun ge seuchang de lei.

⁷Chidadege â kedei ze ’nrui ze kenuklia bam de lei; kedeiloa gu pedimpung ramme ze du kedun ze kedei-kaketei de lei, pa pe lumpumdibe ziegeneu.

⁸Pe nêuki gene hemika chu de lei, zai pe muiki gene rûmut’nderabe hemi pat ze hegeî heigiebe pe dagene pat te lei.

⁹Pa ne tingsung kedibe ze tew’mbung gai lu wangkeu de lei; pe pî kangge kemâu tikring seudeibe bam de lei.

¹⁰Pa â kerub peirei gene chua lu liamtat lei; tingkai kan ramme peirei gene pa gizitwang de lei.

¹¹Pa ne pechu ruisungbe muiterîngbe tew gai lei, kemâu heduipungbe mauzingkâng seudeibe ne pechu chûm lei.

¹²Pe masuage ba bambe, chige pe gu kemâu gene desak benai meching heigiebe ramme pat lei.

¹³Tingwang ne tingsung kedibe lung gene hekuâ kechibe tewpat kai lei, zai Hulangpeu ne pe kuâ tewpat kai de lei, desak ramme benai hemi heigiebe ramme zeu.

¹⁴Zai pe gu bai’mpitu ramme ze kap kai bei ze penui je hûtimrarip ’ndi de lei; pa ne hegiria kakepitbe ramme kaibeibe ne penui je tewkeheu gai bei de lei.

¹⁵Hei Tingwang gau, nang ne ’ngngiambeibe, ning nêuki gene ningchui kekupkaibeibe gene kedei ge sungkling sîng ramme changpû bam di, zai heduiga ramme ngau’nchiepuang bam di de lei.

¹⁶Kehu ’mbene pa wangkeu ze achu tei lu, hedui misonggabe gene pa ne achu zupat kai bei de lei.

¹⁷A teureipeu peranchibe gene pa ne achu lupat kai bei de lei, zai achu ngaugailakme dagene du achu lupat kai bei de lei; zai I suadu penui â lungchi’mpiadibe ziegeneu.

¹⁸I pausia ze a duânggabe mai ge penui a peireige wang de lei; kane Tingwang ne achu gugaihapeu chang bei lei.

¹⁹Pa ne achu pebâmdibe ge nguapat kai bei de lei; pa ne achu lupat kai bei de lei, a peireige pa pe suiyibe ziegeneu.

²⁰Tingwang ne I katelingbe luigum ze achu a hî hang chak kai bei de lei; a ba ’ntiabeibe luigum ze pa ne achu peiruî kadai de lei.

²¹Tingwang ’mpuî ramme ge I tat’mmi bei, zai a Rapeu dagene a lungriaksiabe ga ze rimnatatmakbe ziegeneu.

²²Pe gu hingde tewgaibe leine ze a masuage bambe ziegene, zai pe gu hingde rawdiakkaibe ramme du a dagene I tuâmakbe ziegeneu.

²³Pe suage I â hetiâk ga ze lung lei, zai tewmaurabe gene I a runne achu reîchi ze bam lei.

²⁴Chipauziegene I telingbeibe luigum ze, pe mikngau ge I ne ’nchibeibe luigum ze Tingwang ne achu peiruî dai bei de lei.

²⁵Lungsang peigaime dage nang du nang lungsangtewbe ze teilia gai lei; ziemmena hetiâkgabe kau dage nang du nang hetiâkgabe ze teilia gai lei;

²⁶’nchichiak ze bamme dage nang du nang ’nchichiak ze bambe ze teilia gai lei; zai lungsangtewmakme dage nang du nang kakeriângbe teilia gai lei.

²⁷Kecheiluîtewbe kau je nang ne lupat kai daseu; kane gechîrettewme je nang ne tewhelêu gai bei de lei.

²⁸Eu lei, nang ne a gu kachâbung ’ntau gai lei; Tingwang a Rapeu ne a gu kemuîbe tewreba gai lei.

²⁹Eu lei, ning ziegene hereime je I tewniang dui lei; zai a Rapeu ziegene kerie kedibe peirei I ’nsakchu dui lei.

³⁰Ai Hera—pe gu ’mpuî ze â yi’nsangsiak lei; Tingwang gu hatkaibe ze â gesang lei be ’nchetpat lei; pe dage wang ze ka’nseume leine hangge pa â hinggei chang lei.

³¹Châu ne Hera chang lau, Tingwang ne makchai? Zai châu ne tingchutum chang lau, anui Rapeu ne makchai?—

³²aize â achu dangguagitbambe, zai a ’mpuî hang teleuzungaibeibe Hera de lei.

³³Helungpui pî gum ze pa ne a pî du tew gai bei de lei, zai mâ-mâ kehube bâm ramme ge zeûne ze bam ra pa ne achu kai bei de lei.

³⁴A ba ne herei ra hang pa ne betak geteilia de lei, chidezai hetageî bai’mpi ze chak’mbungchi le ra hangge zeu.

³⁵Ning gu tewka’nringbe hinggei nang ne achu pei gai bei de lei, zai ning ba hezat’mbia ba ne achu tei’nggim bei de lei, zai nang karenuabe zene achu tew’ndi gai bei de lei.

³⁶A kangge a pichaî hang pebâm kedibe nang ne achu pei bei de lei, zai a pî kena kau gai mak lei.

³⁷A reime je I gua’nchu ze penui je guachang lu de lei; zai penui je tew’ngga’nzâu gai mak tâne I ’nreiwang dai mak lei.

³⁸Penui je I ne huîpelapik kai bei de lei, chidezai penui zuachudaichi lak ra hangge zeu; a pî kangge penui kau gai de lei.

³⁹Hereirabe hang nang ne achu dangguagit kai bei de lei; zai achu ka’nggime a kangge sukkeu gai ra nang ne tew gai bei de lei.

⁴⁰A reime ne achu pak’nnuktatliâ ra nang ne tew gai bei de lei, zai achu ngaugailakme je I ne tew’nsia gai bei de lei.

⁴¹’Ngngâ gai ra hang penui kûsa de lei, kane mî ne tew’nring gai ra ga tai de lei, Tingwang je penui kûsa de lei, kane pa ne penui je kak mak tai lei.

⁴²Tingkai ge deseî ’nruk kai gum ze, I ne penui je bêu’mmihâm gai bei de lei; keloaning ge timdeukâng je gum ze I ne penui je hela ’mbe tuâpat kai bei de lei.

⁴³Ziemmename zat leine ne achu katimpheube gene nang ne achu lupat kai bei de lei; heramzatme gu besuitewpeu hangge nang ne achu tew gai bei de lei; mâdau du I chimakme ne a guâ kangua de lei.

⁴⁴A rasam penui seugap dege penui a kuâ pheu de lei; kêdabe heramzatme ne ’ngkunrun ze a dage wang de lei.

⁴⁵Hesang hingdeume ne helungchêutew ta di de lei, zai penui gu ’mbaiki ramme gene hingkedun ze zuawang wak te lei.

⁴⁶Tingwang bam bam lei; zai a gu tingchutum je peize yi lau, a gu tewka’nringbe Hera je peize suang’ndi ze bam lau,

⁴⁷a kûm tewgaibeipeu zai hezat ramme je a kut ge nguawanggaibeipeu Hera jeu;

⁴⁸a reime dagene achu lupatkaipeu jeu; eu lei, achu ka’nggime peireige nang ne achu toa’ndi gai bei de lei; ziemmena katîmphibe tâ tewme dagene nang ne achu lupat kai bei de lei.

⁴⁹Hei Tingwang gau, aipau deu hangge heramzatme ruagene ningchu I toa’ndi gai gu lei, zai ning ji je toa ze heleutew gu lei.

⁵⁰Pa ne sumgaibe heguang je pa ne kengambe kedibe pei lei, zai pa ne ’nnukkaime Dabidbe benai pe chaname dage hungka’ntipbe teilia bam lei.