Read Zeme Naga GETOABELEU 19 Bible Online

GETOABELEU 19 - Zeme Naga bible

GETOABELEU 19

¹Tingkehube zene Hera ngeudibe ranglia lei; zai tinggîm ne pe bachiâm rasam pauliâ lei.

²Naimikpui kat ne kêdabe naimikpui kat suage mâ-ranglia, zai tingmuî kat ne kêdabe tingmuî kat dage mâ-gechîbe rang’nchi gai lei.

³Sam sabe ga lei, sam ramme ga lei; penui kuâ seu me lei;

⁴acheuleusedu penui ’ncheu â kedeirei leine ge seupelarit lei, zai tingmik chang ze penui sam ramme seupela kam lei. Chiramme lungge naimik hang pa ne hetiamki tew gai bei de lei,

⁵henâukupeu pe jeî kisîam sâu ze hela patbe gum, zai ziemmena peranchipeu pe suiyi ze terika’nzu gum patbe zeu.

⁶Tingsung kedibe mik ’mbene pa zuachu lei, zai tingpî chang ze pa tatruatuipik lei; zai naimik lumbe gene mâ de ’mbaidibe ga lei.

⁷Tingwang gu hingde â yi’nsangsiak lei, keringbe je tew’nrakchu gai lei; Tingwang gu samranggaidiakbe â maumeluisui lei, ’mpangpaibe kau je tewningching gai lei;

⁸Tingwang gu mâ-sieyibe geteiliabe â tâutit lei, helungsui tewka’nta lei; Tingwang gu samde â ’nchichiak lei, hemik je ngauchi ra tew gai lei;

⁹Tingwang je hingchibe â mâ-ka’nchibe kau lei, chize betingbeta bam bam lei; Tingwang gu hingdetewgaibe ramme â gesang lei, pelane gesang-peling kam lei.

¹⁰Gechâk suane du zai gechâk yi-kadesangbe suane du, ’nchâ’nteu ze bamrabe ze chiramme ze de lei; ’ngkuidui suanedu zai ’ngkuichîap gene zâukeube ’ngkuidui suanedu kum’ngkeu lei.

¹¹Chipau peireige du ning guâ ka’ngguapeu je chiramme zene hing ra rang’ntua gai bei de lei; chiramme tewbe ge mi hî kedibe lamui lei.

¹²Kane châu ne pe runne pa kemaube chipatduibe kau la lau? Teibai’ndibe hemui ramme gene nang ne achu lun gai lau.

¹³Gechîrettewbe hemui ramme gene ning guâ ka’ngguapeu je tei’mbia ne lau; penui ne a peireige peize samram ze bam se lau! Chidezai I hetiâk ga gu lei, zai hingde ’ngkamauka’ndibe gene ’ngkui mak ra hangge zeu.

¹⁴A mui gene a sam patbe ramme benai a lung ge ’nning’nchukkaibe ramme ze ning mikngau ge lu gai ra yibe hang peize chang lau, Hei Tingwang, a gu tingchutum zai achu ripatpeu gau.