Read Zeme Naga GETOABELEU 2 Bible Online

GETOABELEU 2 - Zeme Naga bible

GETOABELEU 2

¹’Ndaitew ze hezat ramme ne ’nggi, zai ’ndaitew ze ziemmena ramme ’ntakûne mâ-kesiatew ra ka’ndei lau?

²Kedeirei gu heguangme zai heguang changme penui runne helua lu ze, Tingwang benai pe gu ’nnukkai’ndipeu peireige ’nggi ra aigum sa lei,

³“Penai kaheluabe geze anui ne tewpâng ne kei lei, zai penai gu herakteibe anui dagene tuâ ne kei lei,” ze acheu zeu.

⁴Tinggîm ge ka’ntaupeu ne ka’nnui lei; Tingwang ne penui je ’nneî ze ka’nnui lei.

⁵Chidadege pa pe lumpumbe ne penui je ’mpau gu lei, zai pe râtabe ne penui je hing ra tew gai ze

⁶“A gu kedeiloa ka’nchibe Zaion ge I ne a gu heguang je kai ’nde lei,” ze kacheu de lei.

⁷Tingwang gu âzah I ne ranglia gu lei, Pa ne a suage, “Nang â a na lei, nemai ge I ne ningchu lungkeu gai de lei.

⁸A dage kie lau, dezai heram hezat leine ze ning heurâ hang tew gai gu lei, zai kedeirei leine ze ning heurâ hang tew gai gu lei.

⁹Hegeîtui ne penui je nang ne lak’nsia gu lei, zai heli tewpeu gu hegamli penui ne tewpâng gum ze nang ne penui je tewpâng gu lei,” ze kacheu de lei.

¹⁰Chidaze chunage Hei heguangme gau, ningnui ’nningchi le lau; Hei kedeirei ge samramme gau, ’ntîng le lau.

¹¹Kedun ze hing-hingne ze Tingwang guâ ’nggua lau,

¹²pe pî keput lau, makchai â, pe râta gu lei, zai ’mpuîki gene ningnui ga gai gu lei; pa â pe râtabe ze kelua ze (hemi gum) ’ntau gai ’ndaseu. Pe dage ’nseulume leine ze yi de lei.