Read Zeme Naga GETOABELEU 22 Bible Online

GETOABELEU 22 - Zeme Naga bible

GETOABELEU 22

¹A Rapeu gau, a Rapeu gau, ’ndaitew nang achu sâu gai ’ndi lau? I huaipun ze bambe kuâ ramme gene, achu ’ngngârabe gene ’ndaitew nang deutau ze bam di lau?

²Hei a Rapeu gau, ’nrîmbeting ge I kûsa ze bam lei, kane nang achu kak mak lei; zai tingmuî ge du saukatemibe ngau mak lei.

³Acheuleusedu nang â ka’nchibe kau, Israelme ne ningchu toa ’ndi ze bambepeu de lei.

⁴Ning dage anui peume ne ’nnumtew ze bam lei; ningchu penui ’nnumtew ze bam de lei, zai nang ne penui je lupat kai bei de lei.

⁵Ningchu penui kûsa de lei, zai penui je tew’nring gai bei de lei; ning dage penui â ’nnumtew ze bam lei, zai penui je tewkengam gai mak lei.

⁶Kane I â tingseibe de lei, ziemmena mak lei; ziemmename ne ’nrûgetie zai ziemmena ne ngau’nna ze bam de lei.

⁷Achu kengaume leine ne teihenuitew ze bam lei, achu penui mui tewlia ze penui peî kengûm-lia lei;

⁸“Tingwang dage pa â pe gu deu ze pei pat kai lei; peize pa ne pechu meupat kai be lau, pa ge pe lungsuiyi ze bambe ziegeneu!”

⁹Acheuleusedu nebâm lung gene achu lupatpeu a nang de lei; a pui ne achu ka’mpâmbe luage nang ne achu reheiheka gai bei de lei.

¹⁰Achu lungkeu gai dege ningchu I â ’ngguigit bam di de lei, zai a pui ne achu lungkeugaibe gene seuze nang â a Rapeu chang ze bam bam lei.

¹¹A dagene deutau ze bam se lau, kahereube wang’nna la lei, zai ’ngngârabe kau mî de ’ngga lei.

¹²Getumsei ramme ne achu tuaguâ ze lamui lei, Bashan gu getumsei peranchibe ramme ne achu sapgua ze la lei;

¹³penui mui ramme achu ’ngngaliâ lei, duilui mâ-teu nei ze kakehuk gum zeu.

¹⁴Achu â hedui gum ze ruîtua ’ndi de lei, zai a ra ramme leine du ’ntuk ta kam de lei; a lung â tega gum tai de lei, a ga ge luapin pat kai de lei;

¹⁵hegamli ’ngkaktibe gum ze a ranchi du changku tai de lei, zai a lei du a hak ge kupgit ze la de lei; kechaibe kedeiniamoîne zeu ge nang ne achu ’njei gai bei de lei.

¹⁶Eu lei, hetei ramme a taige guâgit ze lamui de lei; tâ-kesiabe tewbe kiangna ne achu tuagua lei; penui ne a ba benai a pî hia bei de lei—

¹⁷A ra ramme leine I sei le duî kam lei— achu penui pie’nsua lu piekari ze bam lei;

¹⁸penui ruage a paî ramme penui katimchâk lei, zai a paîni hangge penui hedachak te lei.

¹⁹Kane nang, Hei Tingwang gau, deutau ze bam se lau! Hei nang achu ka’ngngapeu, achu ’ngngâ gai kelua zu lau!

²⁰Hiazutkie gene a keringbe je lupat kai lau, zai hetei ranchi gene a keringbe lupat kai lau!

²¹Duilui mui gene achu tew’nringpat kai lau, deîhereugaibeibe a keringbe je hênam tumsei kie ramme gene tew’nringpat kai lau!

²²A puiname dage ning ji ze I ranglia gu lei; baudime wangka’nduibe ruage I ningchu toa gu lei:

²³Ningnui Tingwang je hingchime leine pechu toa lau! Ningnui Jakobbe name leine gau, pechu suang lau, zai ningnui Israel name leine gau, pe suage hengêutewbe gene hing-hingne ze sap lau.

²⁴Kahereupeu gu kahereube ze pa â ngau’nna mak, zai ngautenat kai me lei; pe dagene pe ju du bai me lei, kane pechu kûsa gai dege pe kuâ ze pa ne ’ngking bei lei.

²⁵Baudime misongga wangka’nduime ruage a gu getoabeleu hangge ning dagene pat lei; pechu hingchime masua gene I deseugailube ramme leine tewpui gai gu lei.

²⁶Tewhereugailume â teu lu ’nggeugit bam gu lei; Tingwang je gepeume â pechu toa ze bam gu lei! Ningnui lung ze peize betingbeta ring ze bam lau!

²⁷Kedeirei mik medai ge pezat leine ne Tingwang je ’nningdau lu pe lam ’nreiwang kam gu lei; zai heram ramme pezat gechâm-châmme leine ne pe suage kellum kam gu lei.

²⁸Samrambe rezie ze â Tingwang gu chang lei, zai hezat leine peireige pa ne samram lei.

²⁹Eu lei, kedeirei kechî-keditewme leine ne pe dage keikeu kam gu lei; kedeiniamoîne ge kâugaidime leine pe suage keikeu kam gu lei, zai pe runne ringchi lak ze bambe kau du pe suage keikeu gu lei.

³⁰Rehei chudairame ne pe guâ ’nggua gu lei; wangdairabe reheime dage ziemmename ne Heguang rasam salia gu lei,

³¹zai chuna riâ lungkeu mak ze bamme dage pa nguapatkaibe rasam ze pauliâ gai gu lei, aize pa ne tewpui gai bei de lei.