Read Zeme Naga GETOABELEU 24 Bible Online

GETOABELEU 24 - Zeme Naga bible

GETOABELEU 24

¹Ai kedeirei ze â Tingwang gu lei, zai pelung ge puigit ze bambe leine du pe gu lei, kedeirei zai chige kelungme leine ze du pe gu lei;

²pa ne kedei ze sungkling peireige tei’ntau gai bei de lei, zai ’nggeuki ramme peireige kedei ze pa ne tei’nsap kai bei de lei.

³Tingwang gu kedeiloa ge châu ne chu ra lau? Zai châu ne pe gu ka’nchibe bâm ge sap ra lau?

⁴Mige pe ba ka’nchibe kau, zai pe lung ka’ntiabe kau, mâ-karasa tewbe lam ge pe gu keringbe tatkaimakbe kau, zai ’nchoâ ne deseutewmakbe kau ne ra lei.

⁵Pa â Tingwang dagene ’nnamgaibe ngau gu lei, zai pechu tewka’nringpeu Hera dagene gesang-peling teiliabe ngau gu lei.

⁶Pechu peume rehei â aigum ze bam de lei, Jakobbe Rapeu ju peume bau zeu.

⁷Hei keriekemui ramme gau, ningnui peî ze ’ngngangchu lau! Hei ’ndâ gu ’ngkam ramme gau, latpat kai zu lau, dezai pengêudibe Heguang gut le ra hangge zeu.

⁸Pengeudibe Heguang ze châu lau? Tingwang, peranchibe zai tâtewchibe, Tingwang herei ge pe ranchipeu de lei!

⁹Hei keriekemui ramme gau, ningnui peî ze ’ngngangchu lau! Hei ’ndâ gu ’ngkam ramme gau, latpat kai zu lau! Dezai pengêudibe Heguang gut le ra hangge zeu.

¹⁰Ai pengêudibe Heguang ze châu lau? Baudime gu Tingwang, pa â pengêudibe Heguang de lei.