Read Zeme Naga GETOABELEU 25 Bible Online

GETOABELEU 25 - Zeme Naga bible

GETOABELEU 25

¹Hei Tingwang gau, ning lam a keringbe teichu’ngngu gai lei.

²Hei a Rapeu gau, ning dage I ’nnumtew lei, peize achu tew’ngngam gai se lau; a peireige a reime ne penui suiyi ze peize bam se lau.

³Eu lei, ningchu heguîkuame leine je peize tew’ngngam gai se lau; miramme je kapedeube kau ramme je peize ’ngngam lau.

⁴Ning gu ’mpuî ramme chî le ra achu tew gai lau, Hei Tingwang gau; ning gu ’mpuî tak ramme achu getei gai lau.

⁵Ning gu samsang ge achu ngua gai ze achu getei gai lau, nang â tewka’nringbe Hera daseu; naimikpui tâluî ningchu I kuâ bam lei.

⁶Nang ka’nggiabe benai hungka’ntipbe deze ’nningdau bam lei, Hei Tingwang gau, ’ndâ gene du chiramme â bam di daseu.

⁷I hena’ngka a gu hemui ramme, zai hedieka’ngkabe ramme ze chî bam se lau; ning gu hungka’ntipbe bambe luigum ze achu chî bam lau, nang keyibe ziegeneu, Hei Tingwang gau!

⁸Tingwang â keyibe benai ka’nzeibe de lei; chipauziegene hemuime je ’mpuî singbe ge pa geteilia lei.

⁹Kecheiluilungpungme je kapelingbe ge pa ne ngua gai lei, zai kecheiluilungpungme je pe gu ’mpuî ze getei gai lei.

¹⁰Tingwang gu ’mpuî ramme leine â, hungka’ntipbe benai lungsangtewbe lei, pe gu samhatkaibe benai pe gu hingde ramme teichime hangge aî.

¹¹Ning ji hang ziegene Hei Tingwang gau, I kemaube lun gai lau, chize di-desang di de lei.

¹²Tingwang je hingchibe ziemmena ze châu lau? Pechu â pe gu ’mpuî kelângrabe tak hangge pa ne getei gai gu lei.

¹³Pa â lung’ntua ze bam bam gu lei, zai pe cha pe name ne heram ze ’nram gu lei.

¹⁴Tingwang ne pechu hingchime je pe kangtew ze kangua lei, zai pe gu samhat ze penui dage ranglia lei.

¹⁵A mik ne Tingwang lam pie’nrik bam lei, chiâkrak gene a pî pa ne heipat kai gu daseu.

¹⁶A lam nang ’nreiwang lau, zai achu ngau’nggia gai lau; I a runne la lei, achu tewhereu gai bei zeu.

¹⁷A lungge kahereube ze tewhegei gai lau, zai a duânggabe gene achu lupat kai lau.

¹⁸I hereuliebe benai kahereube ze nang ne ’nningchi gai lau, zai a gu hemui ramme leine ze lun gai lau.

¹⁹Achu ka’nggime ’ndaikie ge la mei be ’nningchi gai lau, zai ngaugailakme sîtra ne penui ’ndaizeuge achu ngaugailak mei be zeu.

²⁰Hei a keringbe ze reî gai lau, zai achu lupat kai lau; achu tew’ngngam gai se lau, I â ning dage ’nseu la daseu.

²¹Lungkattewbe benai ka’nzeibe ne achu tei’nggim gai lau, ningchu I kuâ la daseu.

²²Israelme je ’nripat kai lau, Hei Hera gau, pa kahereube leine geneu.