Read Zeme Naga GETOABELEU 27 Bible Online

GETOABELEU 27 - Zeme Naga bible

GETOABELEU 27

¹Tingwang â a gu kebabe zai a gu tewka’nringbe bangpui lei, châu je I hing ra lau? Tingwang â a keringbe ’mbaibâm lei; châu je I hing ra lau?

²Tâ-kesiabe tewme ne achu sa’nsia ze ka’nggibe luage, achu ka’nggime benai a teureime penui ’nrap lu kau gu lei.

³Baudime ne achu ’nzuiguâ leusede, a lung ge mâ de hing ra mak lei; a peireige herei ’ndetchu leusede, I â hingmeluisui ze bam gu lei.

⁴Tingwang dage mâ kat I kie gai lei, chize I peu ze gualui bam gu lei; a gu keringbe ting ge Tingwang ki ge I bam bam le ra hangge zeu, Tingwang luî yibe I pie bam ra, zai pe gu kellumki lungge chize ’nning bam ra hangge zeu.

⁵Kahereube mai ge pa ne achu pa bambe ki ge tei’mbai gai gu lei; pe gu hetiam lungge pa ne achu gumchim ’ndu lei, tingchutum peireige pa ne achu teichu’ngngu gai gu lei.

⁶A reime achu guâgit bambe peireige chuna a peî ze ’ngngûchu gu de lei; zai misuiyibe kuâ ’ngkiak ze herâtewbe ze pa bambeki lungge I peipat kai gu lei; Tingwang dage heleu’mmung yibe kai ze I toa gu lei.

⁷I kû’nchi gai dezai seutâu gai lau, Hei Tingwang gau! Achu ngau’nggia ze a kuâ kak kai lau!

⁸“Ningnui a ju peu lau,” ze nang ne kacheu de lei. “Tingwang gau, ning ju I peu lei,” ze a lung zene ningchu I kacheu de lei.

⁹A dagene ning ju ’mbai se lau. Ning lumpumbe gene ning guâ ka’ngguapeu je chui’mbia gai se lau, nang â achu ’ngngâbambepeu lei. Achu tuâpat kai se lau, achu sâu gai se lau, Hei achu tewka’nringpeu Hera gau!

¹⁰A peu benai a pui ne achu sâu gai nan leusede, Tingwang ne achu ngua ’ndu lei.

¹¹Hei Tingwang gau, ning gu ’mpuî tak ze achu geteilia lau; zai pebâm yibe ’mpuî luî-luî achu nguatat lau, a reime bambe ziegeneu.

¹²Achu ka’nggime ne penui sui-sui tew ra achu peipat kai se lau; a peireige karasa ne sakkitewme ne tuaguâchu mui de lei, zai achu tewkeleu ra penui dam-kadesang lei.

¹³Tingwang keyibe ze keringme ram ge I ngau gu lei be ’nnum’mmi lei!

¹⁴Tingwang je kuâ bam lau; ning ranchi ze ning lung di ze bam lau; eu lei, Tingwang je kuâ bam lau!