Read Zeme Naga GETOABELEU 28 Bible Online

GETOABELEU 28 - Zeme Naga bible

GETOABELEU 28

¹Hei Tingwang gau, ningchu I ku lei; a gu tingchutum gau, a kuâ seu mak gum bam se lau, achu ning kuâneu mak ze bam dizai â rehûmkuiki ge kêugutkaidime gum ze I chang lei.

²A kiamsam I paugaibe ze ’ngking gai lau, ’ngngâ ra hangge ningchu I kûka’nrungbe luage, ning gu ’nchilangbe bâm lam’mbe a ba getua’nrikkaibe luage zeu.

³Helungriaksiame ruage, zai kesiabe tâ tewme, penui kiningme suage yi ze ’mpau lu, kane penui lungge tew’nsiarabe lung pungme ruage achu teitat’mpam gai se lau.

⁴Penui tatew luigum ze penui je peiruî dai be lau, penui gu kesiabe tatew luigum zeu; zai penui ba tatew ramme luigum ze penui je peiruî dai be lau; penui hî ngau ra bambe ze penui je pei gai be lau.

⁵Tingwang tatew ramme zai pe ba chiam ramme je penui ne mâ-hangge du chakkaimakbe ziegene pa ne penui je tewkau ’ndu, zai penui je tei’nsapchu gai ta du de lei.

⁶Tingwang je toa ze peize bam lau! A kiamsam ramme pa ne seutâu gai bei de lei.

⁷Tingwang â a ranchi benai a gu hinggei lei; pe dage a lung ’nnumtewgit ze bam lei; chigum ze achu ’ngnga bei de lei, zai a lung suiyi-kadesang de lei, zai a leu ne pechu a suiyibe sam I pau gai lei.

⁸Tingwang ne pe gu ziemmename hangge heranchibe de lei, pa â pe gu ’nnukkailupeu hangge kechai’nreipatbe ’mbaibâm lei.

⁹Hei ning gu ziemmename je tew’nring gai lau; zai ning haîhikme je ’nnam gai lau; nang ne penui hangge melireîpeu chang ze, penui je kiappua bam lau.