Read Zeme Naga GETOABELEU 29 Bible Online

GETOABELEU 29 - Zeme Naga bible

GETOABELEU 29

¹Tingwang je ’nning’ndi gai lau, Hei tinggîm ’mbe bambe ramme gau, pengêudibe benai tâtewchibe ze Tingwang peireige pei gai lau.

²Pe ji pengêudibe, Tingwang je suang zu lau, paîni ka’nchibe kai lu ze Tingwang je kellum zu lau.

³Tingwang kuâ â hedui ramme peireige la lei; pengêudibe Hera kuâ kengimchun bam lei, zai heduidibe ramme peireige pa â Tingwang lei.

⁴Tingwang kuâ â reziechibe lei, Tingwang kuâ â kaheguangbe kuâ sing lei.

⁵Tingwang kuâ ne kedarching ramme tewbat lei, Tingwang kuâ ne Lebanon gu kedarching tewbat lei.

⁶Pa ne Lebanon je getumpoine gum ze ’nsumrua ra tew gai bei de lei, zai Sirion je hênamtumsei poine gum ze ’nsumrua ra tew gai bei de lei.

⁷Tingwang kuâ ne hemimelei hiaripat kai lei.

⁸Tingwang kuâ ne hênamkang kengim’ngngai gai lei, Tingwang ne Kades ram gu hênamkang gechuî ka’ngngai lei.

⁹Tingwang kuâ ne ’mpu bang ramme guikebit ra tew gai lei, zai ’nrêu chingbang ramme du chuihuak kai lei; zai pe gu kellumki lungge haimena ne ’nrung ze, “Pengêudi lei,” kacheu de lei.

¹⁰Tingwang â heduidibe peireige heguang chang ze ka’ntau lei; Tingwang â heguang chang ze betingbeta hangge ’ntau bam lei.

¹¹Peize Tingwang ne pe gu ziemmename ranchi hang pei gai be lau! Tingwang ne pe gu ziemmename je yi ze peize ’nnam gai be lau.