Read Zeme Naga GETOABELEU 30 Bible Online

GETOABELEU 30 - Zeme Naga bible

GETOABELEU 30

¹Hei Tingwang gau, ningchu I toa’ngngutau gai lei, nang ne achu zupat kai bei daseu, zai a reime ne a peireige peize penui suiyi bam ra nang ne pei gai mak bei daseu.

²Hei Tingwang a Rapeu gau, ’ngngâ gai ra hangge ning dage I kûka’nrung lei, zai nang ne achu tew’mmi gai bei de lei.

³Hei Tingwang gau, nang ne a keringbe je Kechaiberam gene zuchu gai bei de lei, rehûmkuiki ge kêugutme ruagene I ring ra tew gai bei de lei.

⁴Hei ningnui pe gu ka’nchime gau, Tingwang je toa ze leutew lau, zai pe ji ka’nchibe deze ningnui suiyi lau.

⁵Pa pe lumpumbe â keduîne kak hang runne lei, zai pa ngauka’nggiabe â keringbe ting hang de lei. Kehapbe â tingmuî ge bamkuâ gu lei, kane hechua ge hesuiyibe nguabapat lei.

⁶“Mâtew-tewsedu ’ngngaî dai ra mak lei,” ze I lung’ntua ze bambe gene kacheu de lei.

⁷Hei Tingwang gau, nang ngauka’nggiabe gene kedeiloa kedibe je gum ze nang ne achu sum’ntip kai bei de lei; nang ne ning ju ’mbai ’ndi dadege I hing di de lei.

⁸Hei Tingwang gau, ningchu I ’nrung ze ku lei; zai Tingwang dage a kiamsam I pei gai lei:

⁹“I hûm ge keu gai dizai â I chaibe gene chige ’ndaikau kegiebe bam ra lau? Kedeiniamoîne ne ningchu toa ra se mei? Chize ne nang lungsangtewbe rasam salia ra semei?

¹⁰Hei Tingwang gau, seutâu gai lau, zai achu ngau’nggia gai lau! Hei Tingwang gau, achu ka’ngngapeu nang ne chang lau!” ze acheu zeu.

¹¹Kadesuibe gene mi suiyi ze kelimbe hang nang ne achu tew gai bei de lei; nang ne a gu miseigiriapaî gâupat kai bei de lei, zai helungsuiyibe ne a kia ge ’ngkang gai bei de lei,

¹²dezai a keringbe zene ningchu toa ze peize zîng bam me ra hangge zeu. Hei Tingwang a Rapeu gau, betingbeta I ningchu suiyibe rasam pau gai bam gu lei.