Read Zeme Naga GETOABELEU 31 Bible Online

GETOABELEU 31 - Zeme Naga bible

GETOABELEU 31

¹Hei Tingwang gau, nang ge ’mbaibâm hang I peu lei; mâtew-tewsedu achu peize tew’ngngam gai se lau; ning gu kapelingbe gene achu lupat kai lau!

²A lam ning kun ’ndualie gai lau, achu kelua ze meupat kai lau! Nang ne a hangge ’mbaichutum chang gai lau, achu tew’nringpat kai ra hangge nang ne keriengdi ka’ntipbe chang gai lau!

³Eu lei, nang â a gu tingchutum zai a gu keriengdi lei; ning ji hang ziegene achu nguatat kai lau,

⁴achu teikatimbaibe chiâkrak gene lupat kai lau, nang â a hangge ’mbaibâm chang daseu.

⁵Ning ba kereîbe ba ge a runne achu I pei gai lei; nang ne achu ripat kai bei de lei, Hei Tingwang, lungsangtewbe Rapeu gau.

⁶Mâ-peruânggabe heraluîtewbe ramme ngeutewme je nang ne ngaugailak lei; kane I â Tingwang ge ’nnumtew bam lei.

⁷Nang hungka’ntipbe deze I a suiyi’nta ze a lungsuiyi gu lei, achu tewkahereube ze nang ne ngau bei daseu, I a pausiabe lua ramme ge nang ne tei’nggim bei lei,

⁸zai a teureime ba ge nang ne achu peipat kai mak lei; pebâm dibe ge a pichaî hang nang ne tew gai bei de lei.

⁹Achu ngau’nggia gai lau, Hei Tingwang gau, I lunghereu ze lamui lei, a lungkahereube gene a mik heruîkeu da, a keringbe benai a pum ze du huîkeu de lei.

¹⁰I a suisiabe ne acheu bam di de lei, zai a tingkum du huaipunbe ne tat kam de lei; a gu hemui-helut ziene a ranchi du ’nnukeu di, zai a ra ramme du ’nnîkelak ze bam kam de lei.

¹¹Achu ka’nggime ziegene a ji sia de lei, a kiningme ne achu â hingrabe kau zat hang chang de lei, a luîchime ne achu â hingrabe kau zat hang chang di de lei; ’mpuîki ge achu ngaulume leine ne a dagene pak ti ti de lei.

¹²Ziemmename ne kechaibe je ’ngngaî ’ndi gum ze achu ’ngngaî nan laleu lei; heli pângdibe gum ze I â chang di de lei.

¹³Eu lei, misonggame ne mâ-katelumbe kuâ I seu de lei— mâ-mâ bâm leine ge kehingbe zat ramme bam lei!— a peireige penui ’nteumena ne kelutew lei, a keringbe je lu le ra hangge penui kesia ka’mpung lei.

¹⁴Kane nang ge I ’nnumtew lei, Hei Tingwang gau, “Nang â a Rapeu lei,” ze I kacheu de lei.

¹⁵A ting â ning ba ge lamui lei; a reime benai achu tewsâme ba gene achu lupat kai lau!

¹⁶Ning guâ ka’ngguapeu peireige peize ning ju lerba gai lau; ning gu hungka’ntipbe gene achu tew’nringpat kai lau!

¹⁷Achu peize tew’ngngam gai se lau, Hei Tingwang gau, ningchu I ku de lei; helungriaksiame je peize tew’ngngam gai be lau, penui je â Kechaiberam ge penui kuâneu mak ze peize gut te lau.

¹⁸Kapelingme peireige gechîrettewbe benai mi ka’nneîbe karasasabe leiria ze peize sia de lau.

¹⁹Hei ningchu hingchime hang keyibe nang kaikuagai’ndibe ze kie-desang lei, zai ning dage ’nseu ra wangme hangge ziemmename mikngau ge nang teleukuagai’ndibe zeu!

²⁰Ziemmename kesia ka’mpungbe gene penui je â, nang bambe bâm geze nang ne tei’mbai gai bei de lei; ning gu ka’nseube kangge saka’nsiabe kuâ ramme gene nang ne penui je tei’nggim bei de lei.

²¹Tingwang je peize toa bam lau, pa ne pe gu hungka’ntipbe achu mi ningdaulak ze liâ bei daseu.

²²I hing ze bambe luagene I kacheu de lei, “Ning mikngau gene deutau ’mbe achu â kumtua ’ndi lei,” zeu. Kane ’ngngâ ra hang ning dage kû’nrung bei dege nang ne a kiamsam seu gai bei de lei.

²³Tingwang je hung lau, ningnui pe gume ka’nchime leine gau! Lungsangtewme je â Tingwang ne reheiheka bam lei, kane gechîrettewbe ne tâtewbe kau je â, pa ne gesabe misonggabe ne peiruî gai bei de lei.

²⁴Ningnui ranchi zai ningnui lung di ze bam lau, ningnui Tingwang je kuame leine gau!