Read Zeme Naga GETOABELEU 33 Bible Online

GETOABELEU 33 - Zeme Naga bible

GETOABELEU 33

¹Hei ningnui mâ-pelingtewme gau, Tingwang ge ningnui suiyi’nta du lau! Helung-ka’nzeime ne Tingwang je toa kezei lei.

²’Nrabung tei ze Tingwang je toa lau!

³Pechu heleu karchibe ne tew ze toa lau! ’Nrung’nchi ze ’nrareu ramme kebat’mmi ze toa lau.

⁴Tingwang gu sam â ka’nzeibe kau lei; zai pe tatew leine lungsang gene tew gai lei.

⁵Pelingtewbe benai ka’nzeibe tatew deze pa â ka’nchâ lei; kedeirei ge Tingwang gu hungka’ntipbe ne puigit ze bam lei.

⁶Tingwang sam gene ting kehube tew gai de lei, zai pe chuilu gene tinggîm ge bambe ramme ze ’ndam gai bei de lei.

⁷Pa ne judageîping ge gum ze sungkling gu hedui ramme teiheruawang gai bei de lei; sungkling gechukbe pa ne meruaki ge kai bei de lei.

⁸Kedeirei leine ne Tingwang je peize hing ze bam lau, kedeirei ge kelungme leine ne pechu hingbe ze peize sapbam lau!

⁹Pa ne sa gai bei ze bam kam di daseu; Pa ne die gai bei ze sapchu kam di de lei.

¹⁰Tingwang ne heramzatme gu mâ-tâtew ra geteiliabe ramme tew’nsau gai bei de lei; hezat ramme tâtew ra ka’ndambe ramme ze pa ne tew’ntâm gai bei de lei.

¹¹Tingwang gu mâ-geteiliabe â betingbeta bam bam lei, pe lungge mâ-ka’nningbe ramme â rehei ’nsangne hang bam bam lei.

¹²Tingwang je penui Rapeu hang changme, zai pe heurâ nguaheu ra pa ne kelângbeime heramzatme â yi gu lei!

¹³Tingwang tinggîm ’mbene piekeu ze ziemmename name ramme je pa â ngau kam bam lei;

¹⁴pa heguang chang ze ka’ntaube bâmrak gene kedeirei ge kelungme leine je pa piepat ze bam lei,

¹⁵penui ’nteumena lungsui hang peigaipeu, zai penui tatew leine hezêu ze bambepeu zeu.

¹⁶Heguang je â pe gu hereikangme peranchime ne tew’nringpat kai mak lei; kahereipeu ze du pa pe ranchibe zene pechu ripat kai mak lei.

¹⁷Duî-lerabe hangge hekun peireige ’nnum’mmi gai ra hang â, mâ de betâu ga de lei, zai pe kutkube ranchi zene tew’nringgaichi lak lei.

¹⁸Pie gai ni lau, Tingwang mikpie â pechu hingchime peireige bam lei, Pa hungka’ntipbe ge heguîkuame peireige zeu,

¹⁹chidezai kechaibe gene penui gu keringbe je pa ne lupat kai ra, zai herakûm ting ge penui je ’ngkut’nring gai le ra hangge zeu.

²⁰Anui keringbe zene Tingwang je kuâ bam lei; pa ne anui je ka’ngngâpeu zai anui gu hinggei lei.

²¹Eu lei, pe dage anui lungsuiyi lei, pe ji ka’nchibe ge anui ’nnumtewbe ziegeneu.

²²Ning gu hungka’ntipbe â Hei Tingwang gau, anui peireige peize bam lau, nang ge anui kaheguîbe luigum zeu.