Read Zeme Naga GETOABELEU 34 Bible Online

GETOABELEU 34 - Zeme Naga bible

GETOABELEU 34

¹Pehî leine ge Tingwang je I toa bam gu lei; Pechu getoabe leu zene a mui ge bam bam gu lei.

²A keringbe ze Tingwang gene ditau bam lei; kahereube lieme ne peize seu lu ze penui lungsuiyi lau.

³Hei Tingwang je achu nguatoa gai lau, zai anui ne pe ji je toa’ngngutau gai kam kei lei!

⁴I Tingwang je peu de lei, zai pa ne a kuâ kak kai bei de lei, zai I kehingbe ramme leine gene pa ne achu lupat kai bei de lei.

⁵Pechu pie lau, zai ning ma rengachai ze bam lau; dezai mâtew-tewsede nang ning ma siarak kai ra mak lei.

⁶Ai ziemmena kelaksiapeu ze kûka’nrung de lei, zai Tingwang ne pe kuâ seu gai bei de lei, zai pa kahereube ramme leine gene pechu tew’mmipat kai bei de lei.

⁷Tingwang gu angel’mpeu ne pechu hingchime leine je â tuaguâgit bam lei, zai penui je lupat kai lei.

⁸Hei Tingwang yibe tak ze heda ze pie gai ni lau! Pa gene ’nseu ze bamme â yi gu lei!

⁹Hei Tingwang je hingchi ze bam lau, ningnui pe gu ka’nchime gau, Pechu hingchime hangge â mâ-ka’nnangga lei!

¹⁰Duilui perîsibe kau ramme mâ-teu gai ra ga ze ’njei-lielak ze bam lei; kane Tingwang je peume â pe hang mâ-yibe ’nsang mak ze bam mak lei.

¹¹Wang lau, Hei a name nung gau, a kuâ ’ngking le lau, Tingwang je hingchirabe tak I ne ningnui je getei gai gu lei.

¹²Ziemmena châu ringneibe kau, zai ringtieneibe kau la lau, dezai keyibe pa lu ra hangge zeu?

¹³Ning leiria ze kesiabe gene reî’mmi ne lau, zai ning mui ze gechoabe sam sa mak ra reî’mmi ne lau.

¹⁴Kesiabe gene ’mbia de lau, zai keyibe tew lau; desieyibe peu lau, zai chize gua’nsa lau.

¹⁵Tingwang mik â katelingme lam pie’nrik ze bam lei, zai pe kun du penui kûka’nrungbe lam ’ngkingka’nrik lei.

¹⁶Tingwang â kesiabe tâ tewme je ngaugailak lei, kedeirei gene penui rasam ga gai de ra tew gai lei.

¹⁷’Ngngâ gai ra kapelingme kû’nrung gai bei dege â, Tingwang ne seu gai bei bei lei, zai penui kahereube ramme gene penui je lupat kai bei de lei.

¹⁸Tingwang â hereu peduânggame hangge na lei, zai hereu ze pechui lupatlakme je tew’nringpat kai lei.

¹⁹Pelingtewme hangge misongga ze hereulierabe bam lei; kane chiramme leine gene pechu Tingwang ne lupat kai bei lei.

²⁰Pa ne pe ra ramme leine ze rehei ze bam lei; pe ra katte tewbatbe ga lei.

²¹Helungriaksiame je â kesiame ne gîchat ku lei; zai kapelingme je ngaugailakme je â chau’ngkui gai gu lei.

²²Pe guâ ka’ngguame ramme gu keringbe je â Tingwang ne ripat kai lei; Pe dage ka’nseume leine je â mî je du chau’ngkui gai ra mak lei.