Read Zeme Naga GETOABELEU 35 Bible Online

GETOABELEU 35 - Zeme Naga bible

GETOABELEU 35

¹Achu ka’nggime je ’nggi be lau, Hei Tingwang gau; achu katimpheume je timpheu be lau!

²Hinggei benai hinggei cheibe ’nzap lu ze achu ’ngngâ ra hangge zuachu lau!

³Achu guaka’nchume peireige hengeu benai depuî-ngeu huachu gai lau! Zai a keringbe je, “I ze ningchu ripatkaipeu lei,” ze acheu gai lau.

⁴A keringbe tew’ngga ra peume je tew’ngngam gai be lau! A peireige kesiatew ra ka’nningme je peize hechai’nnuk te lau, zai peize pangnang bam de lau!

⁵Tingkai guibe ge chêuriepum gum ze penui je peize bam lau, Tingwang gu angel’mpeu zene peize penui je guatua gai zeu!

⁶Peize penui ’mpuî ze muî de lau, zai ’nneihit ze bam lau, Tingwang gu angel’mpeu zene peize penui je gua’nchu zeu!

⁷Mâ-pedeu ga ze a hangge penui chiâk-’mpia gîng gai lei; mâ-pedeu ga ze a hangge penui hûm rua gai lei, a keringbe hangge zeu.

⁸Chîmezîngbe gene peize penui peireige tewka’nsiabe wangchang lau! Zai penui chiâk’mpia gînggaibe zene penui je peize mi lau; peize penui je chipau lungge kêugut kai lu chai de lau!

⁹Chidezai Tingwang ge a keringbe lung’nta gu lei, pa lupatkaibeibe peireige hesuiyi ze ’nsumchai zeu.

¹⁰A ra ramme leine ne acheu sa gu lei, “Hei Tingwang gau, nang gumbe kau châu la lau, peran-gapeu je pa suadu peranchi ka’nteupeu dagene lupatkaipeu, zai peran-game benai kegame je mâ sutpeu ba gene lupatkaipeu nang zeu?”

¹¹Katîmphibe sakki zat ramme ’ndetpat lei; I chimakbe ramme penui ne achu ’nneu zeu.

¹²Keyibe hangge kesiabe ne achu peiruî gai lei; a keringbe ’nggiâkia la de lei.

¹³Kane I â, penui ’nrâteuneube luage— I â miseigiriapaî ba de lei, I â a runne ne achu teseureibe gene deîhereu ze bam de lei. I a peî ze kei’ngkumtit lu kakellum de lei,

¹⁴a kangpeu mei nune a sikina kau mei hanggene a suisia gum zeu; I â mige pe pui je heu ze bambepeu gum ze ’ngkumgit lu desui ze tatrua bam de lei.

¹⁵Kane I ’nrap lu kâukeube luage penui suiyi ze zuawang lei, a peireige penui zuawangka’ndui de lei; lungtudrabe kau mâdau du I chimakme ne sau ta di ze a rasam pau’nteurie bam de lei;

¹⁶penui ki ’nsia ze teihenuitewranbi-bi bam de lei, achu penui geu kegitlia de lei.

¹⁷Hei Tingwang ’ndaitie ge nang pe mapie bam ra rei lau? Penui ne tew’nsiazut kai’nderabe gene achu meupat kai lau, a keringbe ze duilui ramme dage neu!

¹⁸Chidezai baudime wangka’nduime suagene ning dage hesuiyibe sam I sa gu lei; Baudime seikamlakme ruagene ningchu I toa gu lei.

¹⁹A peireige peize penui suî’nta gai se lau, a teureime ’nchuimak-kadesangme bau zeu, zai peize penui mik kechingliâ se lau, mâ-pedeu ga ze achu ngaugailakme bau jeu.

²⁰Penui â mâ-yirabe sam sa mak lei, kane heram lungge ’nsimrimbamme peireige choa gai ra ka’mpung lei.

²¹A peireige penui muiki ’ngngalatla lu ze, “Hai, Hai! anui mik ne chize ngau lu de lei,” ze penui kacheu de lei.

²²Nang ne ngau lu de lei, Hei Tingwang gau; ning kuâneu mak ze bam se lau! Hei Tingwang gau a dagene deu ze bam se lau!

²³’Nninghereu gai du lau, zai a deu hangge ’nning’nchap kai du lau, a Rapeu zai a Wangpeu gau!

²⁴Hei Tingwang, a Rapeu gau, ning gu kapelingbe luigum ze achu gesang-peling teilia gai lau; zai peize a peireige penui suî’nta gai se lau!

²⁵Peize penui je, “Hai, anui lungwângchang-desang de lei!” ze acheu gai se lau. Peize penui je, “Pechu anui ne ’nzua lu de lei” ze acheu se lau.

²⁶Peize penui je tew’ngngam gai be lau, zai tewpangnang gai be lau, a duânggabe ge penui suiyime bau jeu! Peize penui je ka’ngngambe benai kahelêube ne bâ ze bam lau, a peireige penui runne penui ’nrîm lu ze bamme jeu!

²⁷I ka’nzeibe luigum ze a deu teleu’nzei gai ra luneime bau je peize penui suiyi ze ’ngkiak ze helungsui’nta lau, zai peize acheu ze sa bam lau, “Tingwang â Kedibe lei, pe guâ ka’ngguapeu deu hang yi ra luneipeu zeu!” ze acheu zeu.

²⁸Chidezai a leiria ne ning gu kapelingbe rasam salia gu lei, zai tingnaimikpui tâluî ningchu toabe ze salia gu lei.