Read Zeme Naga GETOABELEU 36 Bible Online

GETOABELEU 36 - Zeme Naga bible

GETOABELEU 36

¹Helungriaksiabe kau je pe lungsîng gene tâ-kesiabe tewbe zene pechu ka’mpau de lei; pe suage Hera je kehingbe mâ de ga lei.

²Pa â pe runne pechu pe ruâgetua ze bam lei, chidezai pe gu hemui-helut ze pa ngaupatchi lak bam ra, zai ngau’nriechi lak ra hangge zeu.

³Pe mui ge samsabe ramme ze hejaîsittewbe benai kechoabe ’nnia lei; ’nchingchi ze tâtewrabe benai keyibe tewrabe hang â pa sâu ’ndi de lei.

⁴Pe jeî ge jeibe luage pa â pe jaîsittewrabe hangge ’nsap bam lei; yimakbe ’mpuî ge pa â tat kai bam lei; Pa â kesiabe ze tuâ mak lei.

⁵Ning gu hungka’ntipbe ze Hei Tingwang gau, tingsung kedibe riâ chang lei, nang pelingtewbe ze kemâu ge du chang lei.

⁶Nang kapelingbe â Hera gu kedeiloa ramme gum hu ze bam lei, nang samrambe â sungkling gum chuk ze bam lei; Hei Tingwang gau, ziemmena benai hekaubena je nang ne reheiheka bei lei.

⁷Hei Hera gau, ning gu hungka’ntipbe ze yi-desang lei! Ziemmename name ning kan kezui kangge ka’nseu lei.

⁸Ning ki keheubeki heurâ gene penui luu ze bam lei, zai ning suiyibe geuki gene penui sak ze bam ra nang ne penui je pei bei lei.

⁹Ning dage keringbe depin la lei; ning gu kebabe gene kebabe anui ngau lei.

¹⁰Hei ningchu chime dage ning gu hungka’ntipbe bam bam lau, zai ning gu tewka’nringbe ze helung-ka’nzeime dage bam bam lau!

¹¹Hei gechîrettewme pî ze a peireige peize wang se lau, zai helungriaksiame ba ne du peize achu chuitua se lau.

¹²Chige kesiabe tâ tewme tuâ’ngkum’ntatui la lei, penui je â tewkau gai bei ze chu dai lak la lei.