Read Zeme Naga GETOABELEU 37 Bible Online

GETOABELEU 37 - Zeme Naga bible

GETOABELEU 37

¹Helungriaksiame ziegene ning runne ning lung ’mmitkeu se lau, kesiabe tâ tewme peireige ning lunggailakbe ze bam se lau!

²Timpei gum ze penui â mâtiege makse heguî gai du lei, zai hereubuâ ka’ndiakbe gum ze lai gai du lei.

³Tingwang ge ’nnumtew lau, zai keyibe tew lau; chidezai heram ge nang lung bam gu, zai lungzeune tew bam gu lei.

⁴Tingwang gene ning suiyi ze bam lau, chidezai ning lung gene nang ka’nchâbe ramme ze, ningchu pa ne pei gu lei.

⁵Ning gu ’mpuî ze Tingwang dage pei gai lau, pechu ’nnumtew lau, dezai pa ne tew gai gu lei.

⁶Ningchu tew’nzeigaibe ze pa ne kebabe gum ze tew gai gu lei, zai nang ka’nzeibe ze du tîngnarî gum zeu.

⁷Tingwang suage hekuâkie mak ze rim bam lau, zai liechi ze pechu kuâ bam lau; lung’ntuachudipeu peireige, zai ziemmena mâ-kesiabe chiampatchipeu peireige ning lunggailak ze bam se lau,

⁸mi-râtabe gesut lau, zai helumpumbe gene sau de lau! Ning runne ning lungtew’mmit se lau; chize â kesiabe ge runne ngua gai ka’nsui lei.

⁹Helungriaksiame je â ngettua ’ndu lei; kane Tingwang je kuame â heram ’nram gu lei.

¹⁰Mâtiegemakse, helungriaksiabe kau â, ga gai du lei; pe bâm ge nang piegai’mmi sedu chige pa bam ra mak lei.

¹¹Kane kecheiluîtewme ne heram ’nram gu lei, zai misongga pung-ze-sa ze penui suiyi bam gu lei.

¹²Helungriaksiabe kau ne kapelingme peireige kesiatew ra ka’mpung lei, zai pechu pe geu kegitlia lei;

¹³kane Tingwang â helungriaksiame je â ka’nnui lei, pe hangge tingnaimikpui ze wang mui de lei be pa ngau lu dadegeu.

¹⁴Helungriaksiame hiazutkie tatpat kai lei, zai penui bai’mpi ramme ’nsung gai lei, kelaksiame benai kegame je kapkâu gai ra, zai pelung ’nzeitun ze bamme je bichat kai ra hangge zeu;

¹⁵penui gu hiazutkie ze penui lungge gut dai gu lei, zai penui gu bai’mpi ramme ze rîaubet kai ’ndu lei.

¹⁶Helungriaksiame dage misonggabe bambe suane â, ziemmena kapelingme dage kechâmne bambe yi’nteu lei.

¹⁷Helungriaksiame ba’ngkoâk ramme rîaubet ’ndu lei; kane Tingwang ne ziemmena kapelingme je â teigim gu lei.

¹⁸Tingwang â hetiakgame gu beting ramme ze chî lei, zai penui heurâ betingbeta bam bam gu lei;

¹⁹penui je â beting kesiabe ting ge tew’ngngam gai me lei, herakûm ting ramme ge du penui â teu’nggeugit ze bam lei.

²⁰Kane helungriaksiame â ga gai gu lei; Tingwang je ka’nggime â melitaning gu pengêudibe gum lei, zai penui ga gai di tai lei, zai mika gum ze penui ga gai du lei.

²¹Helungriaksiame â hepuk lu ze peiruîdaichi lak lei, kane ziemmena kapelingme â helungyibe ne pei pei lei;

²²Tingwang ne ’nnamgaibeime leine â, heram’nram gu lei, kane pa ne desetkai’ndime je â ngettua ’ndu lei.

²³Ziemmena pikiâm ramme Tingwang dagene pat lei, zai pe gu ’mpuî peireige Tingwang ne pe suiyime je â pechu pa ne sum’ntip kai bei lei;

²⁴pa kau sedu pa â tuâ’nsukrung bam ra mak lei, Tingwang ne pe bagui changbe ziegeneu.

²⁵I hena ze bam da, kane chuna â I chîng de lei, sedu ziemmena kapelingme je sâudiakkaibeibe ze I ngau merei lei; zai pe name ne tingku kieteuruabe du ngau merei lei.

²⁶Pa â heraidi ze peipat bam lei, zai hepuk kai bam lei, zai pe name zene ’nnamgaibe chang di de lei.

²⁷Kesiabe gene sâu lu keyibe tew lau; dezai nang betingbeta bam bam gu lei.

²⁸Tingwang â pelingtewbe je hung lei; pe gu ziemmena ka’nchime je pa sâu gai ra mak lei. Kapelingme je â tei’nggim ze bam bam gu lei, kane helungriaksiame name je â ngettua ’ndu lei.

²⁹Kapelingme ne heram ’nram bam gu lei, zai chige pa lung bam gu lei.

³⁰Kapelingbe kau mui gene kaningchingbe sam pat lei, zai pe leiria gene gesang-peling sa lei.

³¹Pe Rapeu gu hingde â pe lungge bam lei; pe pî kiamgesa mak lei.

³²Helungriaksiabe kau ne kapelingbe kau je rikpie bam lei, zai pechu gîchat ’nde ra peu lei.

³³Tingwang ne helungriaksiapeu gu rezie kangge kapelingbe kau je sâudiak kai ra mak lei, zai pechu pedeu ra nguawang dezai chau’ngkui gai ra mak lei.

³⁴Tingwang je kuâ bam lau, zai pe gu ’mpuî ge tat’mmi lau, dezai heram ’nram ra pa ne ningchu teichu’ngngu gai gu lei; helungriaksiame je tew’nggagai’ndibe nang ngau gu lei.

³⁵Helungriaksiabe kau ziemmena pe suî kam ze bambe I ngau de lei, zai Lebanon gu kedarching bang gum hulieng bambe ngau de lei.

³⁶I tuahiâpat dai ze pie gai dege pa â ga gai di de lei; I pechu peu sedu ngau dai ra mak te lei.

³⁷Hetiakgabe kau ziemmena je ’nchet le lau, zai ka’nzeibe kau je pie gai ni lau, pe lungge keyibe ne puigit bambe kau â, pe hangge rehei keyibe bam lei.

³⁸Kane hedeka’ngkame je â tew’ngga’mpam gai ’ndu lei, helungriaksiame gu hesua lunghangdairabe ze â ngettua kam ’ndu lei.

³⁹Ziemmena kapelingme gu tewka’nringbe ze â, Tingwang dagene pat lei; mi duânggabe kahereube luage pa â penui gu ’mbaiki lei.

⁴⁰Tingwang ne penui je ’ngngâ bei, zai penui je lupat kai bei de lei; zai helungriaksiame dagene penui je lupat kai ze tew’nring gai bei de lei, pe dage penui ’mbaiki hang tewbe ziegeneu.