Read Zeme Naga GETOABELEU 38 Bible Online

GETOABELEU 38 - Zeme Naga bible

GETOABELEU 38

¹Hei Tingwang gau, ning râtabe ne achu ’ngngiam gai se lau, ning lumpumbe ne du achu lak kai se lau!

²Ning gu bai’mpitu ramme a dage gigut te de lei, zai ning ba ne achu dapkau gai ’nde lei.

³A pum â yi ta de lei, ning laîpatkaibeibe ziegeneu; a ra ramme ge a ranchibe ga de lei, a gu hemui ziegeneu.

⁴A gu hemui-helut ramme ne a peirei naî ’nde lei; heput keritbe gum ze chiramme a hangge rit-desang de lei.

⁵A jâm ramme tiamnampak tai de lei, I kemiebe ziegeneu,

⁶I kei’ngkumtit kai lu tuâ’ngkum’ntatui gai de lei; tingnaimikpui tâluî I a suisia ze tatrua bam de lei.

⁷A kia pelane ge tew’nteu kam de lei, zai a pum ge mâ de yi ta de lei.

⁸I a jiesia ze ’ngguaipeniak ti de lei; a lung keheu-desangbeibe ziegene I huai de lei.

⁹A Wang gau, I luneibe ze nang ne chikâ la lei, a chuilukeduahibambe ze ning dagene ’mbai me lei.

¹⁰A lung him, pedum ze a ran-gakeu di de lei; zai a mik kebabe ngaube ze du a dagene ga di de lei.

¹¹A kangme benai a hiâme a dage herarît kesiabe patbe ziegene sap’mbiari ze tai de lei, zai a kibaume du sap’ndeutau bam kam di de lei.

¹²A keringbe tew’ngga ra peume bau ne penui gu ’mpia tew gai lei, achu tewjâm ra peume bau ne I siagaiderabe rasam sa lei, tingnaimikpui tâluî kesia’mpung bam lei.

¹³Kane I â pe kunpangbe kau gum ze seu mak bam lei, pe latpatlak ze pe mui ’ngkakpatmak kau gum ze I â bam de lei.

¹⁴Eu lei, I â pe kun ne seumakbe ziemmena riâ de lei, zai pe mui gene ka’nggiabe sam sapatmakbe kau gum de lei.

¹⁵Kane Hei Tingwang gau, ningchu I kuâ bam lei; Hei Tingwang a Rapeu gau, ning runne lei, a kuâ kakkairapeu zeu.

¹⁶“I a pî chaîhit nan dezai a peireige kedikuâ-kuame penui suiyi’nta ra hang pei gai se lau!” ze I kacheu de lei.

¹⁷I â kâurabe runne de lei, zai I geteuliebe ze a dage bam bam lei.

¹⁸A gu hemui-helut ze I ralia bam lei, a gu hemui ziegene a duângga lei.

¹⁹Mâ-pedeu ga ze achu ka’nggime â penui ranchi-desang lei, tâu meluisui ze achu ngaugailakme â kie-desang lei.

²⁰Keyibe hangge kesiabe ne peiruime ze achu ka’nggime de lei, I â keyibe sui daseu.

²¹Hei Tingwang gau, achu sâu gai se lau, Hei a Rapeu gau! A dagene bam’ndeu se lau!

²²Achu ’ngngâ gai kelun lau, achu teukanringpeu, Hei a Wang gau!