Read Zeme Naga GETOABELEU 40 Bible Online

GETOABELEU 40 - Zeme Naga bible

GETOABELEU 40

¹Tingwang je liechibe ne I kuâ bam lei; a lam’mbe pa ’ngngiakeu ze I hapbe kuâ seu gai bei de lei.

²Achu tew’nsiarabe hûm gene pa ne zupat kai bei de lei, zai a pî tingchutum peireige kai bei de lei, a pikiâm ramme ze tew’ntip kai bei de lei.

³Pa ne a mui ge heleu karchibe kai bei de lei, anui Rapeu je getoabe leu zeu. Misonggame ne ngau lu ze hing gu lei, zai Tingwang ge penui lung pei gai gu lei.

⁴Tingwang ge pa ’nnumka’mmibe kau, gechîrettewme lam’mbe tatmakbe kau, hera karasa zat ramme lam ge suitatmakme yi gu lei!

⁵Hei Tingwang a Rapeu gau, anui lam ning gu tâningdaulakbe ramme benai ning lung ge ka’nningbe ramme ze nang ne tewpung gai bei de lei; mî du ningchu teikedarabe kau ga lei! Chiramme ze I peurua ze salia ra dizai â, chiramme â sei kam lak lei.

⁶Herâtewbe benai kela peibe deze nang â ’nchâ mak lei; kane nang ne achu seurabe kun pei bei de lei. Rûkambe-râtewbe benai hemui-râtewbe deze nang â ’nnang sua mak lei.

⁷Chidadege â I ne, “Pie lau ni, I wang lei; leisi zui lungge a rasam raw gai ’ndi de lei;

⁸Hei a Rapeu gau, I ne ning suî’nning tewrabe ze I a lungsuiyi lei, ning gu hingde ze a lung ge lamui lei,” ze kacheu de lei.

⁹Baudime wangka’nduime ruage ripatkaibe misuiyibe sam ze I ne salia gai bei de lei; pie le lau, a mui I â kelim gai mak lei be nang ne chikâ la lei, Hei Tingwang gau.

¹⁰Nang tewka’nringbe ka’ngngâbe rasam a lung ge I ne kebai ze bam me lei, nang lungsangtewbe benai nang tewka’nringbe rasam ze I ne salia gai bei de lei; baudime wangka’nduibe ruagene, nang hungka’ntipbe benai ning gu lungsangtewbe tak ze I teikebai me lei.

¹¹Nang ka’nggiabe ze a dagene tei’ngngîn gai se lau, Hei Tingwang gau, ning gu hungka’ntipbe benai ning gu lungsangtewbe zene peize achu ’nggum ze bam lau!

¹²Kesiabe ramme ne seikamlak ze achu ’nzuiwang ze bam de lei; a gu hemui-helut ne achu I ngauchilakrabe riâ nupchim ze bam lei; chiramme ze a peîtam suadu kie di de lei; a lung cheikeu gai di de lei.

¹³Hei Tingwang gau, ning suiyi ze achu lupat kai lau! Hei Tingwang gau, kelua ze achu ’ngnggâ lau!

¹⁴A keringbe tew’ngga ra peume je tew’ngngam gai ze, zai tewkeleulia gai kam be lau; achu tewhejamgaineime je peize ’nnuktat dai ze heleû gai de lau!

¹⁵Achu, “Aha, Aha!” ze kacheume je â penui ’ngngam ne peize penui duânggarak ze bam lau.

¹⁶Kane ningchu peume leine je â nang ge hesuiyi’nta ze peize bam lau; ning gu tewka’nringbe ka’nchâme ne, “Tingwang â di lei!” acheu peize sa bam lau.

¹⁷I â kelaksia zai kegabe kau chang leusedu Heguang ne achu chibam lei. Nang â achu ka’ngngâpeu zai ripatpeu de lei; gîngtie se lau, Hei a Rapeu gau!