Read Zeme Naga GETOABELEU 42 Bible Online

GETOABELEU 42 - Zeme Naga bible

GETOABELEU 42

¹’Nggeuterak hedui luabe je helungpui ne huî bam gum ze, a keringbe ze du ningchu huî bam lei, Hei a Rapeu gau!

²Hera je a keringbe zene herei-desang ze bam lei, keringbe Rapeu jeu. ’Ndaidaune I wang ze Hera ju pie gai ra lau?

³Kemuî keba a mikdui ne a hetak chang ze bam de lei, “’Ndaige ning gu Hera la lau?” ze ziemmename ne achu acheu ze bambe luage zeu.

⁴Airamme I ’nningdau de lei, a keringbe I ruîpatkaibe luage zeu: ’Ndaigum ze I tingtie’ngka ge baudime ruage tat lu ze Hera ki ’mbe I ne penui je nguakeluarua ze nguatat mei be, zai chige anui suigut ne ’nrung ze bambe, zai getoabe leutew ze kahengîbe tak zeu.

⁵Hei a keringbe gau, ’ndaitew ze nang desungra ze bam, zai ’ndaitew nang a lung ge bamdaulak ze bam lau? Hera ge heguî lau; I pechu toa dai gu rei lei, achu ka’ngngâpeu,

⁶a Rapeu jeu. A keringbe â a dagene desungra la lei, chidadege ningchu I ’nningdau lei, Jordan ram zai Hermon zai Mizar deiloa gezeu.

⁷Gechukbe ne gechukbe je ku lei, ning gu hedui-hetia ramme kuâ chibe geneu; ning gu hedui-teleu ramme benai ning gu hedui gesuâkchuka’ngngube ramme ze a peirei ’mbene luachim ’nde lei.

⁸Naimikpui tâluî Tingwang ne peize pe gu hungka’ntipbe pei lau; dezai kemuîbe ting ge pechu getoabe leu ze a dage bam gu lei. A keringbe Rapeu dage aize I kie lei.

⁹Hera, a gu tingchutum dage, “’Ndaitew ze nang achu ’ngngaî ’ndi lau? Hereime kategabe gene ’ndaitew ze desui ze tat ra lau?” ze I kacheu de lei.

¹⁰A pum ge pungchatrabe jâm helî gum ze a reime achu sa’nsia ze bam de lei, “Ning Rapeu ’ndaige la lau?” ze penui ne achu acheu ze bambe luage zeu.

¹¹Hei a keringbe gau, ’ndaitew ze nang desungra ze bam, zai ’ndaitew ze a lung ge nang bamdaulak ze bam lau? Hera je heguî lau; pechu I toa dai gu rei lei, achu ka’ngngâpeu zai a Rapeu jeu.