Read Zeme Naga GETOABELEU 44 Bible Online

GETOABELEU 44 - Zeme Naga bible

GETOABELEU 44

¹Hei Hera gau, anui kun ne anui seu lu de lei, ’ndâ gechîng rehei ting, penui ting ge nang ne ’ndaikau tâ ramme tew gai mei be rasam anui paume ne anui suage saliabe zeu:

²nang ne ning ba gîmsing ne heramzatme je kelitua de lei, kane penui je nang ne tau gai lei; ziemmena zat ramme je nang ne tewhereu gai lei, kane penui je nang ne ’mpat kai lei;

³penui gu hiazutkie gîmsing ne penui heram duîgut mak lei, penui baranchi sing ne penui je kengambe pei mak lei; kane ning ba hezat’mbia ba benai ning baranchi ne, zai ning mâ-yibe kebabe ne ngam gai bei de lei; nang ne penui peireige ning lungsuiyibe bambe ziegeneu.

⁴Jakobbe je kengambe chang ra tewgaipeu, nang â a Wangpeu zai a Rapeu lei.

⁵Nang bambeibe ziegene anui teureime je anui chuikau lu de lei; ning ji ziegene anui kahereime je anui chaîkau lu de lei.

⁶A gu bai’mpi ge du I â ’nnumtew me lei, zai a gu hiazutkie ne du achu tew’nringchi lak lei.

⁷Kane anui teureime dagene nang ne anui je tew’nring gai bei de lei, zai anui je ngaugailakme je nang ne tewpangnang gai bei de lei.

⁸Hera gene anui â ditau ze bam bam de lei, zai betingbeta ning ji je anui toa bam gu lei.

⁹Acheuleusedu nang ne anui je tuâpat ze tewhelêu gai bei de lei, zai anui gu hereikangme ruage nang â nguatat mak lei.

¹⁰Nang ne anui je mi teureime dagene helat dai ra tew gai bei de lei; zai anui teureime ne hereichâ lu ’ndi de lei.

¹¹Meli tewchat’nderabe kau je gum ze nang ne anui je tew gai bei de lei, zai hezatme ruage anui je guatimrachiak kai bei de lei.

¹²Nang ne ning gu ziemmename je sêulabe hangge zua gai nan tai lei, penui hangge pemî kie’ngkie mak zeu.

¹³Anui kiningme ne sa’nsia-desang ra hang nang ne anui je tew gai bei de lei, anui hiage bambe kau ramme ne teihenuitewrabe benai ngau’nnarabe hang nang ne tew gai bei de lei.

¹⁴Hezatme ruage teiherangtewrabe hang anui je nang ne tew gai bei de lei, zai ziemmena zat ruage teihenuitewrabe hangge tew gai bei de lei.

¹⁵Naimikpui tâluî ze I helêukeudibe ze a suage bam bam lei, zai ka’ngngambe ne a ju gumchim ze bam lei,

¹⁶ngauka’nname ne sa’nsia-desang ze bambe sam ge benai ka’nrûbe sam zai mi teureime benai hekûmtewme mikngau ge zeneu.

¹⁷Ningchu anui ’ngngaî mak bam leusedu, zai ning gu samhatkaibe tew’nsia mak sedu airamme pelane penui peireige wangchang gai de lei.

¹⁸Anui lung â hechai’nnuktat me lei, zai ning gu ’mpuî gene anui pikiâm du kiam’mmie me lei,

¹⁹munserung ramme bambe gene anui je nang ne tew’nsia gai ze, anui je muiterîngbe ne gumchimgai’nderabe hangge zeu,

²⁰anui Rapeu ji anui ne ’ngngaî ’ndi mei, nune hera kêdabe lam’mbe anui ba getuapat kai ’ndi mei zai â,

²¹aize Hera ne ngaupat mak ta ra mei? Pa â helung ge ka’ngkimbe ramme chî kam lei.

²²Makte ning ziegene naimikpui tâluî anui je gîchat bam de lei, zai meli tewchatrabe kau zat hangge riam gai lei.

²³Nang zuachu gai zu lau! ’Ndaitew nang jei bam lau, Hei a Wang gau? ’Nrakpat chu lau! Betingbeta hang anui je tuâpatzut kai se lau!

²⁴’Ndaitew ze ning ju ’mbai ra lau? ’Ndaitew anui hereuliebe benai kategabe liebe nang ’ngngaî ’nde ra lau?

²⁵Anui gu keringbe â kedei ’mbe kei’ngkumgit la de lei; zai anui pum du kedei ge ’ngkingtit la de lei.

²⁶Zuachu ze anui je ’ngngâ ra hang wang lau! Ning gu hungka’ntipbe bambe zene anui je lupat kai lau!