Read Zeme Naga GETOABELEU 45 Bible Online

GETOABELEU 45 - Zeme Naga bible

GETOABELEU 45

¹Sampui yibe ne a lung ge pui’nniâmba la de lei; Heguang suage I a leu samkie dum ramme ’mpuak kai lei; a leiria â leisi rawchika’mmipeu gu leisi rawbe-tang gum lei.

²Ziemmena ruage nang â hejupâ yilangbe de lei; ning mui ge ngauka’nggiabe ruî gai de lei; chipauziegene Hera ne ningchu betingbeta hangge ’nnam gai bei de lei.

³Ning gu hiazutkie ze ning kia ge reu gai le lau, Hei Tâtewchipeu gau, ning ngeudibe benai kaheguangbe ge zeneu!

⁴Nang kaheguangbe gezene ngam lu ze tatchu lau, samsang, kecheiluîtewbe zai kapelingbe hangge zeu; ning ba hezat’mbia ba gene ngauhingbe tatew ramme tew ra ningchu peize getei gai be lau!

⁵Heguangpeu teureime lung ge ning gu bai’mpitu ramme petû yi-desang ze la lei; hezat ramme ning pîkangge kau gai lei.

⁶Ning gu Hera heguang-bamrak â betingbeta bam bam lei. Ning gu heguangki gu langsiutui â kapelingbe langsiutui de lei;

⁷nang â kapelingbe je ka’nchâ lei, zai helungriaksiabe kau je ngaugailak lei. Chipauziegene Hera ning Rapeu ne kêdabe heguangme suadu ningchu helungsuiyibe taudui zene ’nnuk kai bei de lei;

⁸ning mechuatiebe ramme Mur, zai Alos zai Kassi namyibe ne puigit ze bam de lei. Hepuagim ne tewbe heguang-bâm gu ’nrabungreu kuâ ramme gene ning lungsui tew’nta ze bam lei;

⁹heguang na ’mpuimi ramme â ning gu ’mpuimi pengêudime ruage lamui lei; nang hezat’mbia ba ge Ophir ram gu gechâk kai lu ze heguangpui sap la lei.

¹⁰Seu le lau, Hei a na ’mpuimi gau, ’nningdesi gai ze ning kun ’ngngiakeu lau; ning zatme benai ning peu ki ze ’ngngaî ne lau;

¹¹dezai heguang ne nang heleuyibe ze ngau’nrai gu lei, pa â ning wangpeu chang daze pechu hengêu pei lau;

¹²Tirame, lungyilangme ne ningchu kela lungyibe heurâ leine pei gai ze ning hat-tew ze kiâm gu lei.

¹³Heguang na heleu’mpui ze â gechâk ne heziak tewlube paî bâ lu ze pe kisîam ge kerubit ze bam lei;

¹⁴pechu â heziak misonggabe paî ramme bâ gai lu, pekangme heleu katimsangme ne pe pam chang lu heguang tailam nguatat ti de lei.

¹⁵Heguangki ge penui gutbe luage hesuiyibe benai helungsuiyibe ne penui je nguakangzangtew ze gut te lei.

¹⁶Ning peume kelei ge ning name ne chang gu lei; kedeirei leine ge nang ne penui je heguang na heleume hang tew gai gu lei.

¹⁷Reheipiakeube leine ge ning ji teisuang ze bam ra I ne tew gai gu lei; chidezai hezat ramme ne ningchu betingbeta toa bam gu lei.