Read Zeme Naga GETOABELEU 46 Bible Online

GETOABELEU 46 - Zeme Naga bible

GETOABELEU 46

¹Hera â anui ’mbaiki zai anui ranchi, mi duânggabe ge ka’ngngâbe-bangpui chang ze bam lei.

²Chipauziegene ai kedei ze keli de leusede, kedeiloa ramme sungkling lung gene kechuî’ngngai leusede anui â hing ra mak lei;

³hedui kuâ him bam leusede, zai kedeiloa ramme hedui kagesuâkbe gene kedun ze bam leusede anui â hing ra mak lei.

⁴Hera Hulangpeu gu pebâm ka’nchibe, Hera gu namdi suitewka’ntabe ’nggeuki kat gu ’nggeutenane ramme lamui lei.

⁵Chipau namdi zuilung ge Hera â lamui lei, zai chi namdi ze ’ngngai ra mak lei; tingba’nzangrapatbe luage Hera ne pechu ’ngngâ gu lei.

⁶Hezatme ne penui râta ze keleu, zai heguangram ramme sapkakenuk lei; zai pa ne pe kuâ’nrung gai bei dege kedei luamia di lei.

⁷Baudime gu Tingwang â anui dage la lei; Jakobbe Rapeu â anui ’mbaibâm de lei.

⁸Wang lau, Tingwang tatew ramme pie gai ni lau, kedei ge ’ndaizeuge pa tew’nsia ’ndi mei be zeu.

⁹Tingmik chang ze herei ramme pa ne tew’nsau gai lei; pa ne bai’mpicha rîaubet kai, zai hengeu ze rîaudesuirui gai, zai hekun-timriang ramme ze hemi ne rû gai lei!

¹⁰“Saurim gai zu lau, zai I Hera lei be chî le lau. Achu heramzatme ruage teichu’ngngu gai de lei, zai achu kedeirei ge teichu’ngngu gai de lei!”

¹¹Baudime gu Tingwang â anui dage lamui lei; Jakobbe Rapeu â anui ’mbaibâm lei.