Read Zeme Naga GETOABELEU 49 Bible Online

GETOABELEU 49 - Zeme Naga bible

GETOABELEU 49

¹Aize seu le lau, ziemmena zat leine gau! ’Ngking’mmi le lau, kedeirei ge kelungme leine gau,

²kecheime benai kedime gau, zai keheume benai kelaksiame leine gau!

³A mui gene kaningchingbe sapat kai gu lei; a lung ge I mâ ’nning’nchukkaibe ze chika’mmibe chang gu lei.

⁴A kun ’ngngiakeu ze samrekum I ’ngking gu lei; ’nrabung kebat ze a gu hekî-kibe salia gu lei.

⁵Mi duânggabe luage ’ndaitew ze I hing bam ra lau, achu tewsâme bau gu hemui-helut ne achu guâgitbambe luage zeu,

⁶penui heu ge ’nnumtew ze penui heurâ misongga bambe ge kedikuâ-kua ze bamme bau zeu?

⁷Pelingsing ze mî du pe runne pechu ’nripatchi lak lei, zai Hera dage pe gu keringbe mî peichi lak lei,

⁸pe gu keringbe ’nripatrabe ze pemîhung-desang lei, zai mâtew-tewsedu peipui lak lei,

⁹pa ring ze betingbeta bam bam le ra, zai gechukbe kuiki mâtew-tewsedu pa ngau me ra hangge zeu.

¹⁰Eu lei, ziemmena kaningchingme ’nsangdu kechaibe pa ngau gu lei, ziemmena kemiebe kau benai ka’nsube kau ze du ga gai sing gu, zai penui heu ze mi ramme hang sâudiak kai gu lei.

¹¹Penui ram hang penui ne heram ji ramme ’ntak kai ze bam sede penui raw ramme zene penui ki hang chang ze bam bam ra de lei, rehei leine hangge penui kelungbe bâm hang chang zeu.

¹²Ziemmena â pengêuditau ze bamchi lak lei, pa â hekaubena gumbe riâ de lei.

¹³Aize kemieme hangge wangchangrabe de lei, penui heurâ ge penui lung kaime hang betun-gairabe zeu.

¹⁴Meli gum ze penui je â Kechaiberam hangge chau’ngkiapat kai ’nde lei; chi Kechaibe ze penui gu melireîpeu de lei; heraw ’mbe ’nzeitun ze penui wangkeu lei, zai penui pum hui’ngga gai du lei; Kechaiberam ze penui ki hang chang ra de lei.

¹⁵Kane Hera ne Kechaiberam gu rezie gene a keringbe je ’nripat kai gu lei, pa ne achu lu gai gu daseu.

¹⁶Mige lungyichu dezai, zai pe ki pengêudibi-bi chu dezai hing se lau.

¹⁷Pa chai dezai mâ de pung lu tat ra mak daseu; pa pe ngeudibe ze pe chai suikeu ra mak lei.

¹⁸Pa keringbe ting ge pe runne pechu lungkatemibe hangge chak kai ze bam sedu zai mige pe runne pe hangge tâtewgai’mmi ze bambe ge miramme ne pechu toa bam sedu,

¹⁹pe paume rehei lam’mbe pa zuatat tu lei, mâdau du kebabe ngaumakbe lam gezeu.

²⁰Ziemmena pe ngêuditau ze bamchi lak lei, pa â hekaubena gagaidibe gumbe riâ lei.