Read Zeme Naga GETOABELEU 5 Bible Online

GETOABELEU 5 - Zeme Naga bible

GETOABELEU 5

¹A sam ramme ’ngking gai lau, Hei Tingwang gau; a suisit du ’nning gai lau.

²I ka’nrungbe kuâ seutâu gai lau, a Wangpeu zai a Rapeu gau, ning dage I kie gai lei.

³Hei Tingwang gau, hechua ge a kuâ nang ne ka’ngking lei; hechua ge ning hangge herâtewbe hang I teleu gai lu piekua de lei.

⁴Nang â helungriaksiabe peireige hesuiyibe Hera mak lei; ning dage kesiabe bamchi lak lei.

⁵Ning masuage gechîrettewme â sapchi lak lei; tâ-kesiatewbe tewme leine je nang ne ngaugailak lei.

⁶Karasa-same je â nang ne tewka’ngga lei; hejai kahereime benai choachime je Tingwang ne ngaukatenet lei.

⁷Kane ning gu hungka’ntipbe puigit bambe gene ning ki ge I zuagut ku lei, ningchu kehingbe gene ning gu kellumki ka’nchibe lam’mbe ’nsua lu I kellum gu lei.

⁸Hei Tingwang gau, a teureime bambe ziegene ning gu kapelingbe ge achu ngua gai lau; a suage ning gu ’mpuî tew’nzei gai lau.

⁹Penui mui ge samsang mâ du ga lei; penui lung â tew’nggarabe ’nnia lei, penui ku â heraw latrangbe gum lei, penui leiria ne pahelîtew ze sa’mmichi lei.

¹⁰Hei Hera gau, penui ka’ngkuibe ze penui ne pung ra tew gai be lau; penui kelutewbe sam ramme zene penui je peize kau de lau; penui misongga hingdeka’ngkabe ramme ziegene penui je tuâpat kai be lau, ning peireige penui ka’nggibe ziegeneu.

¹¹Kane ning dage ’nseulume leine ne peize penui suiyi’nta lau, penui je peize hesuiyibe gene heleutew bam lau; zai nang ne penui je sapda lau, chidezai ning ji je ka’nchâme peize ning dage penui suiyi-desang bam ra hangge zeu.

¹²Hei Tingwang gau, katelingbe kau je nang ne ’nnam gai daseu; nang ne hinggei ne gum ze penui je nang ka’nchâbe ziegene diegua gai bei daseu.