Read Zeme Naga GETOABELEU 50 Bible Online

GETOABELEU 50 - Zeme Naga bible

GETOABELEU 50

¹Reziechipeu, Hera Tingwang ne sam sa ze, naimikpatbe gene keugaibe riâ chang ze kedei je kûwang lei.

²Zaion gene peluiyibe yi-kadesangbe Hera ’mbi pat te lei.

³Anui Rapeu wang mui de lei, pa â pe kuâneu mak bam me lei, pe suage rûka’nggabe hemi la lei, heratingkai ne pechu guâgit ze la lei.

⁴Ting-kedei je pa kû gai de lei, pe gu ziemmename je samram ra hangge zeu:

⁵“A kuâ pheume bau, herâtewbe gene a dage samhatkaime bau gau, a dage wang’ndui lau!” ze acheu zeu.

⁶Tingsung kedibe ne pe gu kapelingbe rangba gai de lei, Hera gîmsingbe zene samrampeu chang daseu.

⁷“Seu le lau, Hei a gu ziemmena gau, dezai I sam sa gu lei, Hei Israel gau, I ne ningchu ranglia’nchi gai gu lei, I â Hera, ning Rapeu lei.

⁸Ning gu herâtewbe ramme deze I ki’nrui me lei; ning gu rûkambe-râtewbe ramme a suage bam lamui lei.

⁹Ning ki gene getumsei ramme je du I â ’nchâ ra mak lei, ning gu kemeidung ruagene kemei’nsei du I â ’nchâ ra mak lei.

¹⁰Hênamkang ge hekaubena leine a gu kam lei, kedeiloa chang-chang peireige kebuidung bambe du a gu lei.

¹¹Kehuruî ramme leine je I chî kam lei, zai peningkâm ge ’ngngairuabe hekaune ramme leine a gu kam lei.

¹²“I ’njei di leusedu, ningchu I rang ra mak lei; ai kedeirei zai pelung ge bambe leine a gu kam lei.

¹³Getumsei ramme meiji ze I teu semei, zai kemei ramme jai ze I sak semei?

¹⁴Mi suiyi-yibe sampaugaibe-râtewbe ze Hera dage pei gai lau, zai Hulangpeu dage ningnui hatkailube tewpui gai lau;

¹⁵zai kahereube mai ge achu kû lau, I ne ningchu lupat kai gu lei, dezai nang a ngeutew’ndi gu lei”

¹⁶Kane helungriaksiabe kau dage â Hera ne kacheu de lei: “A gu hingde ramme rawdiakkaibe ning mui ne sa ra, zai a gu samhatkaibe ze ning mui ge tei ra hangge ning hang ’ndaikau kebuibe la lau?

¹⁷I kaladdeibe nang lugailak, zai a sam ramme ning chai’mbe tuâgai’ndibe ziegeneu.

¹⁸Hegateupeu je nang ne ngau dizai â, nang ze pe kangpeu chang di de lei; zai kahemame dage nguakangzangtewdibe chang lei.

¹⁹“Nang â ning mui ge kesiabe latlia lei, zai ning leiria ne keduaibe chiampat lei.

²⁰Nang â ’ntau lu ze ning sikina je sa’nsia ze bam lei; ning pui singbe na ’mpeumi du nang saka’nsia lei.

²¹Airamme nang ne tewgaibeibe I a kuâneu mak ze bam lei; I ze ning luî gumbe kau hangge nang ne ’nning gai lei. Kane chunage ningchu I ka’ngngiam lei, zai ningchu I ne chau’ngkui gai lei.

²²“Chidaze, aize ’nning’mmi le lau, Hera je nang ’ngngaî’ndipeu gau, maklaîzai â, I ne ningchu kuihakhai gai ’ndu de lei, zai mî ne du meupatkairabe ga gu de lei!

²³Mige ne hesuiyibe sam paugaibe ze â, a ngeutewbe herâtewbe de lei; zai pe gu ’mpuî teleuka’nzeibe kau dage Hera gu tewka’nringbe I ne teilia gu lei!” acheu zeu.