Read Zeme Naga GETOABELEU 51 Bible Online

GETOABELEU 51 - Zeme Naga bible

GETOABELEU 51

¹Achu ngau’nggia gai lau, Hei Hera gau, ning gu hungka’ntipbe luigum zeu; nang ne ka’nggiabe puigit bambe luigum ze, a gu hedieka’ngkabe ramme ze nuitua gai lau.

²A gu hemui-helut gene achu hui’nchichiak kai lau, zai a gu hemui gene achu hui’nchi gai lau!

³I chî lei, a gu hedieka’ngkabe ramme zeu, zai a gu hemui â a suage bam bam lei.

⁴Ning peireige runne I hemui gai ze bam lei; zai ning mikngau ge kesiabe tâ tew gai ka’nsui lei, chidadege ning sam kamgaibe ze ’nzei lei, zai ning sam ramme â heziâk ga lei.

⁵Pie gai ni lau, hemui-helut gene achu lungkeu gai de lei, zai hemui gene a pui achu pe gunpung gai lei.

⁶Pie gai ni lau, helung nuksing gene nang â samsang lunei lei; chidaze a lungge kaningchingbe ’mbaidibe ze nang ne achu geteilia gai lau.

⁷Hissop ne achu nui’nchi gai lau, dezai I ’nchi du lei; achu hui’nchi gai lau, dezai I kebun suadu hâ du lei.

⁸Hesuigut benai helung suiyibe ne I puigit bam ra achu tew gai lau; chi nang ne tewbet’ndibe ra ramme je peize hesui’nta lau.

⁹A gu hemui ramme gene ning ju ’mbai de lau, zai a gu hemui-helut ramme ze nuitua gai lau.

¹⁰A dage helung ka’nchibe ’ndam gai lau, Hei Hera gau, zai karchibe benai helungka’ntipbe a lung ge kai lau.

¹¹Ning masua gene achu tuâpat kai se lau, zai a dagene ning gu Herui ka’nchibe lutua se lau.

¹²Ning gu tewka’nringbe suigut ze a dage pei gai dai lau, zai ka’nchâbe lung ne achu tei’nggim lau.

¹³Chidezai hedeka’ngkame je ning gu ’mpuî ramme I ne geteilia gai gu lei, dezai hemui kau ramme ning lam helatwang dai gu lei.

¹⁴Hejai tewpatkai’ndibe mâu gene achu lupat kai lau, Hei Hera gau, nang â achu tewka’nringbe Rapeu lei, zai nang ripatkaibe deze a leiria ne heleutew’nchi gu lei.

¹⁵Hei Tingwang gau, nang ne a mui lat kai lau, dezai a mui ne ningchu toabe sam sarua gu lei.

¹⁶Herâtewbe ge nang ne ning suiyibe ga lei; I ne ning hangge rûkambe-râtew gai bei sedu, nang ne chize ’nchâ sua ra mak lei.

¹⁷Hera ne ka’nchâbe herâtewbe ze â, helung suihuakpatkaibe ze lei; Hei Tingwang gau, helung suihuakpatkaibe benai ’nning’nchukdukkaibe lung tak ze nang ne ’nning’nna gai ra mak lei.

¹⁸Ning suiyibe zene Zaion je keyibe tew gai lau; Jerusalem kerie ramme ze tew’nsapchu gai dai lau,

¹⁹chidezai peling ne herâtewbe ramme ge, rûka’nggabe-râtewbe ge benai peluî rûkambe-râtewbe ramme ge nang ning suiyi’nta ze bam gu lei; chidezai ning gu herâtewbe-kaira ge getumsei ramme peipat dai ze bam gu lei.