Read Zeme Naga GETOABELEU 56 Bible Online

GETOABELEU 56 - Zeme Naga bible

GETOABELEU 56

¹Achu ’nggia gai lau, Hei Hera gau, ziemmename ne a peireige daugetie ze lamui de lei; tingnaimikpui tâluî heteu-hereime ne achu kageted te lei;

²a teureime ne nai’nsangne a peireige daukagetie lei, gekieme ne gechîrettew ze achu katimpheu lei.

³I hingbe luage ning dage I ’nnumka’mmibe kai de lei.

⁴Hera ge pe sam je I toa de lei, mâ de hing mak ze Hera ge I ’nnumka’mmi lei. Ziemmena pum ne ’ndaikau achu tewduibe la lau?

⁵Tingnaimikpui tâluî achu tewkeleu ra penui ne peu lei; penui ka’nningbe leine a hangge tew’nsiarabe kam lei.

⁶Penui runne pebau pungpat lu achu lîmpie ze lamui lei, a pikiâm ramme penui ka’nchet lei. Achu tewchat ra penui ne kuâ bam daseu,

⁷penui kesiabe tewgaibe peireige nang ne mâge â peiruî gai be lau; Hei Hera gau, ning lumpum ne ziemmena zat ramme je tewkeu gai be lau!

⁸Achu tewkahereube ramme ze nang ne riamtei lamui lei; nang ne ning gu judageî-ping lungge a mikdui ramme ’nni gai la de lei! Chiramme ning gu leisikuak ge ’ngga semei?

⁹Chidezai â a teureime hechai’nnuk tu lei, ningchu I kûgaibe mai gezeu. Ai gene I chî lei, Hera â a lam’mbia la lei be zeu.

¹⁰Hera ge pe sam je I toa lei, Tingwang ge pe sam ze I toa lei,

¹¹mâ de hing mak ze Hera je I ’nnumka’mmi lei. Ziemmename ne achu ’ndaikau tewduibe la lau?

¹²Hei Hera gau, ning dage I deseugaibe ramme ze tewhimchang gu lei; ning dage a suiyibe kela ramme I pei gu lei.

¹³Nang ne a keringbe ze kechaibe gene lupat kai bei de lei, eu lei, a pî kâutattibe gene lupat kai bei de lei, chidezai keringbe kebabe ge Hera masuage I tatruachi le ra hangge zeu.