Read Zeme Naga GETOABELEU 57 Bible Online

GETOABELEU 57 - Zeme Naga bible

GETOABELEU 57

¹Hei Hera gau, achu ngau’nggia gai lau, achu ’nggia gai lau, nang ge a keringbe wang ze ka’nseu lei; mâ-tewka’nsiabe heratingkai tuatat mak tânege ning kan kezui ge I wang ze ’nseu gu lei.

²Hera Hulangpeu je I kû’nrung gai lei, a hangge pa ka’nningbe tewpuigaipeu Hera jeu.

³Pa ne tinggîm ’mbene lang gai ze achu tew’nring gai bei de lei, a peireige daukagetieme je pa ne tew’ngngam gai gu lei. Hera ne pe gu hungka’ntipbe benai ’nnumka’mmibe langpat kai gu de lei!

⁴Ziemmena name ramme je gesuakteube duilui ramme zuilung ge I jei lei; penui geu ramme â hengeu ramme benai bai’mpitu ramme de lei, penui lei ramme â hiazutkie muitû ramme de lei.

⁵Hei Hera gau, tingsung kedibe peireige nang tâtewchibe kedibe tak tewlia gai be lau! peize ning ngeudibe kedeirei leine ge bam lau!

⁶A pî kiamgairabe ge penui ne chiâk gîng gai lei; a keringbe ze â desungra ze bam di de lei. A ’mpuî ge penui ne hûm rua gai lei, kane penui runne chige kêugut kai di de lei.

⁷A lung â ’ntiprip ze la lei, Hei Hera gau, a lung â ’ntiprip la lei! Seuyibe kuâ ramme I chiampat ze leutew gu de lei!

⁸A keringbe gau, ’nrakchu zu lau! Hei ’nrabung benai ba kat ne teibe ’nrabung gau, ’nrakchu lau! Ba’nzangrapatbe je ’ngkia’nrakchu gai gu de lei!

⁹Hei Tingwang gau, hezatme ruage I ningchu toa gu lei; heramzatme ruage ningchu I toa ze leutew gu lei.

¹⁰Ning gu hungka’ntipbe ze tingkehube hangge di-desang de lei, zai ning gu kapelingbe ze du kemâu ramme hangge di-desang lei.

¹¹Hei Hera gau, tingsung kedibe peireige nang tâtewchibe kedibe tak tewlia gai be lau! Peize ning ngeudibe kedeirei leine ge bam lau!