Read Zeme Naga GETOABELEU 58 Bible Online

GETOABELEU 58 - Zeme Naga bible

GETOABELEU 58

¹Hei ningnui heguang kedime gau, ka’nzeibe hang ningnui samram pat kai mei? Ziemmename name peireige ka’nzeibe gene ningnui samram mei?

²Mak lei, ningnui lung ge â kemakbe ramme ka’nning lei; kedeirei ge ningnui ba ne tewkeleurua ze bam lei.

³Helungriaksiame â henarak gene tatlietat lei, lungkeube gene du penui mâ-tewmau ze karasa sachu di de lei.

⁴Henêu’nchai teube gum ze penui dage ’nchaiteube lamui lei, mechinêu pe kunpangbe kau gum ze penui kun pang lei,

⁵chi henêu teipeu kuâ mei nune, kahekabe ningchingsiapeu kuâ mei ze seu mak ra hangge zeu.

⁶Hei Hera gau, penui muiki ge penui geu ramme tewbat ne lau; Hei Tingwang gau, duilui perîsibe kau pe gim tiebe ramme gesakpat ne lau!

⁷Hedui lua’nggagaidibe gum ze peize penui je â ’ngga gai de lau; timpei je gum ze peize penui je â kutgetie bei ze heguikeu ze ga gai de lau.

⁸Penui je â tingngitbe penit ’nneirapat ze ’nggagaidibe gum ze peize chang gai de lau, henakeube gene ’ngngiêne chaidibe, mâdau de naimik ju ngaumakbe poine gum ze penui je peize chang gai de lau.

⁹Heli ramme rû’nzai gai ra mei nune rûgie gai ra mei ze heturang ge hemitaube zene ning gu heli ramme rû bei ze lumpat kakeluabe suadu kelua ze pa ne penui je biaktua ’ndu de lei!

¹⁰Hekum ruîgaibe ngaube luage pelingtewpeu suiyi’nta ze bam gu lei; zai helungriaksiame jai ge pa ne pe pî huak kai gu lei.

¹¹Ziemmename ne acheu ze sa gu lei, “Ma-pelingtewme hangge getoabehi hang peibe la sing lei; kedeirei ge samrampeu la sing lei,” acheu zeu.