Read Zeme Naga GETOABELEU 59 Bible Online

GETOABELEU 59 - Zeme Naga bible

GETOABELEU 59

¹A teureime dagene achu lupat kai lau, Hei a Rapeu gau, achu ’nggi ra zuachume dagene achu ’nggum lau,

²kesiabe tâ tewme dagene achu lupat kai lau, zai hejai kahereime dagene achu tew’nringpat kai lau.

³Pie le lau, a keringbe lu ra penui ne bamkuâ la lei; lungkatîmphime ne penui achu ’nggi ra pebau pungchu la lei. Hedeka’ngkabe mei nune a gu hemui mei mâ de ga ze, Hei Tingwang gau,

⁴a mâu mâ de ga ze penui â pakmie ze kedâkua laleu lei. Nang achu ’ngngâ ra zuachu ze wang ze pie gai ni lau!

⁵Nang baudime gu Tingwang Hera â Israelme Rapeu lei. Heramzatme leine je tewsâ ra ’nrakchu gai zu lau; kesia ka’mpungme ruage mî je de ’nzâ gai se lau.

⁶Hegî’nsangne ge penui hetei ramme gum ze ’nra-ngi ze wang, zai namdi lungge mâ-kemutteurua lei.

⁷Chige penui deuzie ne damkehat ze bam lei, zai penui mui ’ngngalatla ze bam lei, “Châu ne anui kuâ seu ra lau,” ze penui ’nning gai lu zeu.

⁸Kane Hei Tingwang gau, nang â penui je ’nnui bam lei; nang â heramzatme leine je sakerai ze bam lei.

⁹Hei nang a Ranchi gau, ningchu toa ze I leutew gu lei; Hei Hera gau, nang â a gu keriengdi de lei.

¹⁰A Rapeu â pe gu hungka’ntipbe gene achu ngauhedau gu lei; a teureime peireige I ne ’nzeuzâ ze pie bam ra a Rapeu ne achu pei gu lei.

¹¹Penui je bichat se lau, makchai â, a gu ziemmename ne ’ngngaî ’ndu lei; ning gu reziechibe ne penui je hûrarip kai be lau, zai penui je tewkeu gai ne lau, Hei Tingwang, anui gu hinggei gau!

¹²Penui gu hemui, penui sam siabe ramme ziegene penui gechîtewbe hî peize penui ngau lau. Penui desetkaibe ze karasa sapatbe ramme,

¹³helumpumbe gene penui je tew’ngga gai be lau, penui ga gai kam de mak tâne penui je tew’ngga gai be lau, chidezai Jakobbe peireige Hera ne tingmik chang ze samram la lei be ziemmename chî le ra hangge zeu.

¹⁴Hegî’nsangne ge penui hetei ramme gum ze ’nra-ngi ze wang, zai namdi lungge mâ-kemutteurua lei.

¹⁵Penui tak peuteurua ze bam lei, zai penui teu’nggeu ra ngaulak dege ’nrakeleulia bam lei.

¹⁶Kane ning ranchi deze I suang gu lei; ning gu hungka’ntipbe deze hechua ge I suang gu lei. Nang ne a hangge keriengdi chang lei, zai a lung hereu ze bambe mai ge nang ne a gu keriengdi benai a ’mbaibâm hang chang bei lei.

¹⁷Hei nang a Ranchi gau, ningchu I suang gu lei, nang â Hei Hera gau, a gu keriengdi de lei, nang â achu hungka’ntipbe teiliabe Hera lei.