Read Zeme Naga GETOABELEU 65 Bible Online

GETOABELEU 65 - Zeme Naga bible

GETOABELEU 65

¹Zaion ge ningchu getoabe pei ra kuâ la lei; Hei Hera gau! zai ning dage deseulube leine tewpui gai gu lei,

²Hei kakellumbe kuâ nang ka’ngkingpeu gau! Hemeipum leine ning lam zuawang kam gu lei,

³hemui ziegeneu. Anui gu hedieka’ngkabe ramme ne anui peireige naî ze bambe luage chiramme nang ne lun gai bei de lei.

⁴Ning gu hekisiâm lungge lung ra hang nang ne kelânglube kau, zai teiwang’nnagaibeibe kau ze yi gu lei! Ning kilûng keyibe gut zene anui lungwângchang gu lei, ning gu ka’nchibe kellumki zeu!

⁵Mi ngauhingbe tatew tak ramme zene nang ne anui je ripat kai ze anui kuâ kak kai bei de lei, Hei anui je tewka’nringpeu Hera gau, tingmik medai ge bamme leine, zai sungkling deulangbe ge bamme ne kaheguîpeu, nang zeneu;

⁶ning ranchi ne kedeiloa ramme tew’ntipkaipeu, tâtewchibe ne puigit ze bampeu nang zeneu;

⁷sungkling ’nrahimbe kuâ, teleu ramme kagesuâkbe kuâ, zai hezat leine gu kakebiengbe kuâ ze tew’nsauzînggaibeipeu, nang zeneu;

⁸chidezai kedei deulangbe riâ chang ze kebamme, ning gu ka’nchetbe ramme deze hing ze bam ra hangge zeu; hechua benai hegî tuatattibe deze hesuiyibe ne ’ngkiak ra nang ne tew gai bei de lei.

⁹Nang ne kedei ge ’ngkiâmie ze chige hedui ramme zuâchim gai lei, nang ne kedei ge puigit bam ra tew gai lei; Hera gu ’nggeuki â hedui ne ’nniâmba la lei; nang ne penui gu helei hang pei gai lei, chigum ze nang ne kedei ze teleu zun gai de lei.

¹⁰Hening pube kedeikâng ramme ’nchiap ra hedui misongga zua gai bei lei, zai kedei pupatbe pa’nriateibangbe ramme tewtenai ra tingsim rui gai bei de lei; zai mâ-kiak ramme chîngchu ra nang ne ’nnam gai bei de lei.

¹¹Ning dage misongga bambe zene patingkum je heguangpeichûp kai bei de lei; Nang tatkaibe bâm ramme ge keheube misongga ze ruikeu gai bei de lei.

¹²Melitaning timpeizeu ge kauruidung ne chuangpuigit ze bam lei, peloa ramme ze hesuiyibe ne bâ gai bei de lei,

¹³peningkâm ramme â meli ramme ne chuangpuigit bam lei, ’nggeukâm ramme ge mâ-hîmra ramme ne pui ze bam lei; penui ’nteumena ne hesuiyibe ne ’nrung zai heleutew bam lei.