Read Zeme Naga GETOABELEU 66 Bible Online

GETOABELEU 66 - Zeme Naga bible

GETOABELEU 66

¹Kedeirei leine gau, Hera hangge hesuiyibe kuâ ramme tewpat kai lau;

²pe ji ngeudibe je leutew lau; getoabe ngeudibe pechu pei gai lau!

³Hera dage, “Nang tâtewbe ramme mi ningdaulak-desang lei! Ning gu rezie disangdibe ziegene ning teureime ning masuage ’ndunkeu lei.

⁴Kedeirei leine ne ningchu kakellum lei; penui ningchu toa ze leutew lei, ning ji je toa ze leutew lei,” ze acheu lau.

⁵Wang ze ngau gai ni lau, Hera ne ’ndaikau tâ tew gai mei be zeu: ziemmena ruage pe gu tatew ramme ge pechu â mi ngauhingku lei.

⁶Pa ne sungkling ze kechangdei hang tew gai bei de lei; ziemmename ne penui pî ne ’nggeuki ze tatka de lei. Chige pe dage anui suiyi’nta ze bam de lei,

⁷pe ranchi zene samrampeu, heramzatme peireige pe mik ne pie bambepeu zeu— peize pechu kategame je penui runne penui je suang gai se lau.

⁸Hei ziemmena hezat ramme gau, anui Rapeu je ’nnam gai lau, pechu getoabe kuâ ze peize seu le lau,

⁹keringme ruage anui je reîpeu, zai anui pî kau ra peigaimakpeu zeu.

¹⁰Nang ne Hei Hera gau, anui je kapedeu de lei; gepût je kakedak gum ze nang ne anui je kakedak te lei.

¹¹Nang ne anui je chiâk lungge teigut kai bei de lei; nang ne anui kia ramme ge kahereube put tua gai bei de lei;

¹²anui peireige ziemmename ne chuarua ra nang ne pei bei de lei; hemi benai hedui ge anui tatpelatat te lei; chigum leusedu nang ne anui je pebâmdibe ge nguachang gai bei de lei.

¹³Rûkambe-râtewbe ne ning ki ge I zuagut ku lei; ning dage a gu deseugailube ramme I tewpui gai gu lei,

¹⁴a duânggabe luage a mui ne I samriagaibe benai sapatkai’ndibe zeu.

¹⁵Ningchu I hekaubena peleuyibe ramme ne rûkambe-râtewbe I pei gai gu lei, meli’nsei ramme ne herâtewbe gu mika zene kai’mpam zeu; getumsei ramme benai kemei ramme zene I peipat kai gu lei.

¹⁶Wang ze seu le lau, ningnui Hera je kehingme leine gau, dezai pa ne a hangge ’ndaikau tew gai mei be I ne ranglia bu lei.

¹⁷I pechu kû’nchi gai de lei, zai a leiria ne pechu suang gai bei de lei.

¹⁸I ne a lung ge hemui-helut ze ’nninglumbup bam dizai â Tingwang ne a kuâ ’ngking gai be ra mak lei.

¹⁹Kane pelingsing ze Tingwang ne ’ngking gai bei de lei; pa ne I kakellumbe kuâ ’ngking gai bei de lei.

²⁰Hera je peize yi lau, pa ne I kakellumbe kuâ tuâpat kai mak, zai a dagene pe gu hungka’ntipbe ze du tei’mbia gai mak bei daseu!