Read Zeme Naga GETOABELEU 68 Bible Online

GETOABELEU 68 - Zeme Naga bible

GETOABELEU 68

¹Peize Hera ne zuachu lau, peize peteu-pereime je hûtimrarip kai be lau; pechu ngaugailakme leine ne peize pe suagene paktat te lau!

²Mika je guitua’ndibe gum ze, penui je guitua ne lau; tega hemi hiage luapin patbe gum, peize helungriaksiame je â Hera masuage ga gai de lau!

³Kane peize pelingtewme je â hesuiyi’nta ze bam lau; Hera masuage penui suiyi’nta ze pei ’nsumchai ze bam lau; peize penui â ngambe leutew ze ’ngkiak ze penui suiyi’nta bam lau!

⁴Hera dage leutew lau, pe ji je toa ze leutew lau; kemâu ramme peireige chuabepeu je heleu tuachu gai lau; pe ji â Tingwang lei, pe masuage ’nsumchai ze bam lau!

⁵Hera pe bâm ka’nchibe ge bambepeu â bepeugame peu lei, zai kemîpuime je sapgupeu lei.

⁶Hera ne kezitruabe kau je pa lungrabe heki pei bei lei; pa ne kebangki ge bangme je lung’ntuachu ra nguapat kai bei lei; kane hingde ka’nggime â heramchangbe ge lung bam de lei.

⁷Hei Hera gau, nang ne ning gume sua raîtatbe luage, nang ne hênamchangbe ruapelapatbe luage,

⁸kedei kechuî gai ze tingsung kedibe gene tingruikeu ra tew gai de lei, Hera bambe masuage zeu; Israelme Rapeu Hera masuage Sinailoa ’nsangdu, nang ne kechuî gai de lei.

⁹Misongga tingruigaibe ze Hei Hera gau, nang ne ’nziruatui gai bei de lei; ning gu heram siakeudibe ze nang ne teichu gai dai bei de lei;

¹⁰chige ning gu melidung ne lungrabe bâm hang ngau de lei; nang keyibe zene, Hei Hera gau! kegame hangge nang ne tinggeu bei de lei.

¹¹Tingwang ne samde pei gai lei; chipau sam pauruame â kiesang-kie bam lei:

¹²“Hereikangme gu heguangme â pak kam de lei!” kilûng ge bamme ’mpuimi ramme ne hereichâ ka’nzi lei,

¹³melidung ruage penui bam leusede— temaune kan ramme gepût ne kûmchimbe, zai pekan gêu ramme ge gechâk ka’ndiakbe ne kûmchimbe ramme zeu.

¹⁴Hera tâtewchipeu ne heguangme je chige hûtimraripkaibe luage Zalmon peireige kebun keu gai de lei.

¹⁵Hei Bashan gu kedeiloa, kedeiloa peranchibe; Hei peloa pa’ntûm hube misongga bambe, Bashan gu kedeiloa!

¹⁶’Ndaitew ze hemimeube ne nang pie lau? Hei kedeiloa pa’ntûm hube misongga bambe, Hera ne pebâm hang ka’nchâbe deiloa gau, eu lei, ’ndaige Tingwang bam bam ra lau?

¹⁷Timriang peranchibe ramme chang kereu tûm kena, chang ne chang bambe tei lu, Sinai gene Tingwang pebâm ka’nchibe ge wang gai de lei.

¹⁸Nang peloa kehu ’mbe keuchu gai de lei, kebang hang tîm’ndime je ning baume ruage nguagut kai lu, zai ziemmena ruagene kela peipatbe ramme ze lu gai ze, zai hingde ka’nggime ruagene du kela peipatbe ramme lu gai zeu, chidezai Tingwang Hera ne chige peize bam ra hangge zeu.

¹⁹Nai’nsangne anui put pungpeu, Tingwang je peize yi lau; Hera â anui gu tewka’nringbe bangpui de lei.

²⁰Anui Rapeu â tewka’nringbe Hera de lei; kechaibe gene teika’mbiabe ze â Tingwang Hera gu lei.

²¹Kane Hera ne pe teureime peî ze tewhitruai gai gu lei, zai kemaube ’mpuî ge tatbe kau peîbungra ramme zeu.

²²Tingwang ne, “I ne penui je Bashan ram gene nguawang gai dai gu lei, I ne penui je sungkling chukbe gene nguawang gai dai gu lei,

²³chidezai ningnui pî hejai ge huakproi gai ra, zai ning gu hetei ramme zene chize penui hang chang ze ’nniakteu ra hangge zeu,” ze kacheu de lei.

²⁴Hei Hera gau, ’nsimrim ze ning gu baudi ka’nzangbe ngau-ngau lei, kakellumbe bâm ’mbe a Wang, a Rapeu gu baudi ’nzanggutbe ge—

²⁵leutewme bau ne hesua ge tat, ’ntoî-’nra teime bau ne tat-hekap, zai penui kakge leutewme bau ne ’nsumkuak bêu ze leutew ze tatbe ge:

²⁶“Baudime ka’nduibe Hera, Tingwang je ’nnam gai lau, Hei ningnui Israelme bangpui gene piakeume bau!” ze acheu tewbe zeu.

²⁷Chige penui ruage cheilangbe, pebau ruage ka’ngguabe Benjamin, baudi ruage Juda gu heguangsinme ramme, Zebulun gu heguangsinme, zai Naphtali gu heguangsinme bam lei.

²⁸Hei Hera gau, ning gu tâtewchibe kû gai lau; Hei Hera, nang anui hang tâtewgaipeu gau, ning ranchi ze teilia lau,

²⁹Jerusalem ge ning gu kellumki bambeibe ziegene, heguangme ne ning hang misuiyibe kela ramme tei lu zuawang lei.

³⁰Hereuzeu ge mârekaune bambe ramme je ’ngngiam gai be lau, heram zatme leine gu getumsei dung benai getumpoine ramme je ’ngngiam gai be lau. ’Mpuâ peigaibe ge ngau’ntetlakme je chaigesip kai be lau; herei giêneibe hezat ramme je hûtimrarip kai be lau.

³¹Ijip gene kangngâgeî peize teiwang gai be lau; Ithiopia ne peize Hera dage kelua ze pe ba getuapat kai be lau.

³²Hei kedeirei gu heguangram ramme gau, Hera dage leutew lau; Tingwang dage getoabe leu tew lau,

³³tingsung kedibe ’ndâge bamdibe peireige chuabepeu jeu; pie le lau ni, pe kuâ, pe gu tâtewchibe kuâ pa ne langpat kai de lei.

³⁴Tâtewchibe rezie ze Hera gu hangge chak kai lau, pe gu kaheguangbe Israelme peireige bambepeu, zai tinggîm kehube ge pe gu rezie bampeu gu zeu.

³⁵Hera ze â kakellumbeki lungge mi ngauhingku ze bam lei, Israelme Rapeu zeu, pa ne pe gume hangge rezie benai heranchibe pei gai lei. Hera je peize yi lau!