Read Zeme Naga GETOABELEU 69 Bible Online

GETOABELEU 69 - Zeme Naga bible

GETOABELEU 69

¹Hei Hera gau, achu tew’nring gai lau! Hedui ramme ne a guangtie riâ sunghangchang ze la de lei.

²Tingniâchukbe ge I kêugut kai di de lei, chige mi pîgim hang gabe bâm ge zeu; hedui kechukbe ge I zuagut kai di de lei, zai hedui-teleu ne a peireige biakgetie ze bam de lei.

³I ’nrung-rung a ran-ga di de lei; a ku chang di de lei. A Rapeu je piekua-kuâ ze a mik mâ-ngauzimra bam di de lei.

⁴A peî ge hetam bambe riak suane mâ pedeu ga ze achu ngaugailakme ne kie’ngkeu di de lei; achu tew’nsiarame â penui ranchi-desang lei, karasa ne achu ka’nggime zeu. I hegamakbe ze chuna I ne pei gai dai sing ra mei?

⁵Hei Hera gau, I kemiebe tak ze nang ne chikâ la lei; kemaube tâ I tewgai’ndibe ramme ze ning dagene tei’mbai gai me lei.

⁶Nang ge kaheguîme ze a ziegene peize ka’ngngambe chang se lau, Hei Tingwang baudime Rapeu gau; ningchu peume ze a ziegene peize kahelêube chang se lau, Hei Israelme Rapeu gau.

⁷Ning ji hang ziegene ka’nrube I punggaibe gu ka’ngngambe zene a ju ruichim ’ndi de lei.

⁸I â a puiname ruage hesang’mpeu gum ze chang di de lei, a pui ne lungkeube ’mpeumi ramme ruage hesanghingdeu’mpeu chang di de lei.

⁹Ning ki hangge ’nninghekuîgaibe zene achu tew’mmut ’ndi de lei, ningchu saka’nsiame ne saka’nsiabe ze a peireige keu gai di de lei.

¹⁰Teseureibe ne I a keringbe je sâ-ze-dei bei dege chize ne achu sa’nsiarabe hang chang gai di de lei.

¹¹Meseigiriapaî ne I a paîni hang tew gai bei dege chize ne achu penui teisa bam ra chang di de lei.

¹²Keriekemui ge ’ntaukua ze bamme ne a rasam dam ze bam lei, zai kameneume ne a rasam hang heleu’mpuak kai ze bam lei.

¹³Kane I â Hei Tingwang gau, ningchu kellum gu lei. Pedâuyibe luage, Hei Hera gau, nang hungka’ntipbe puigit bambe gene a kuâ kak kai lau. Nang ka’ngngâbe keyibe zene,

¹⁴tingniâ ge kêugutkaibe gene achu meupat kai lau; a teureime dagene benai hedui kechukbe gene I pat te ra pei lau.

¹⁵Peize a peireige hedui ne luachim se lau, zai kechukbe ge kêugut kai de ra pei se lau, zai hûm ne a peireige peize gekapnam gai se lau.

¹⁶Achu kak kai lau, Hei Tingwang gau, ning gu hungka’ntipbe â yi daseu; nang ’nggia puigit bambe luigum ze a lam’mbe ’nreiwang gai lau.

¹⁷Ning guâ ka’ngguapeu dagene ning ju ’mbai se lau; I lungkahereube ge lamui lei, kelua ze achu kak kai lau.

¹⁸A lam wang’nna gai lau, zai achu ’nripat kai lau, A teureime ziegene achu ripat kai lau!

¹⁹Achu ka’nrube, I ka’ngngambe zai I kahelêube ze nang ne chikâ la lei; a reime leine ne ningchu chikâ la lei.

²⁰Saka’nsiabe ramme ne a lung tewpâng ’nde lei, chidadege I a lungsui hang ga di de lei. Ngau’nggia gai ra hangge I heguarua da, kane mî de ga lei; zai achu tumgairame je I heguarua da, kane mî je du ngau mak lei.

²¹Teseu hangge chairabe heu penui ne achu pei bei de lei, zai I kahereibe hangge penui ne wain kehiabe sak ra achu pei bei de lei.

²²Penui gu mâ-tewbe-kaira penui suage bambe ze peize ’mpia hang chang gai de lau; peize penui herâtew ze kahengîbe ramme ze ’mpia chang de lau.

²³Peize penui mik ramme ze muîrui gai de lau, chidezai penui ngauchi lak te ra hangge zeu; zai penui kia ramme keduncha ze bamzut te ra hangge zeu.

²⁴Penui peireige ning lumpum ruî gai be lau, zai ning râtabe hemi getaube zene penui je peize guachang lau.

²⁵Peize penui gu sieki ze sia kam de lau, peize mî je du penui gu hetiamki ramme ge lung se lau.

²⁶Nang ne beupeu je penui ne tewsabeibe benai nang ne tewhejamgaibeipeu je penui ne tewhereu-gai-suâbeibe ziegeneu.

²⁷Penui je tewsabe ze tewsâ gai suâ-suâ be lau; penui je â nang gene tew’nzeigaibe peize ngau se lau.

²⁸Peize penui je â keringbe leisikuak gene nuitua ne lau; peize penui je â ziemmena kapelingme ruage rawgut herua gai se lau.

²⁹Kane achu â deîhereu gai bei ze tewbe ted lie ze lamui lei; Hei Hera gau, ning gu tewka’nringbe zene achu peize teichu’ngngu gai lau!

³⁰Hera ji je heleu ne I toa gu lei; hesuiyibe sam pau gai ze pe ji I tew’ndi-desang gai gu lei.

³¹Aize ne getumsei suadu Tingwang suigut tew’ndi’nteu gu lei, ai getumsei bekie benai pa’nchîn pungbe peipatkaibe gene suane aize ne pe ji tew’ndi’nteu gu lei.

³²Kategabe lieme ne peize aize ngau lu penui suiyi lau; ningnui Hera je gepeume gau, peize ningnui lung tew’nrak kai be lau.

³³Tingwang â kegame kuâ seu la lei, zai pe gume kebang chang ze bam leusedu pa tuâpat me lei.

³⁴Peize ting benai kedei ne pechu toa lau, sungkling benai pelung ge ’ngngai ze bambe zat leine neu.

³⁵Hera ne Zaion je tew’nring gai gu, zai Juda gu namdi ramme tew’nsap kai dai gu lei; zai pe guâ ka’ngguame ne chige wanglung gu, zai penui ne chize ’nram gu lei;

³⁶pe guâ ka’ngguame chaname ne chize nguaheu gu lei, zai pe ji je ka’nchâme leine â, chige lung gu lei.