Read Zeme Naga GETOABELEU 7 Bible Online

GETOABELEU 7 - Zeme Naga bible

GETOABELEU 7

¹Hei Tingwang a Rapeu gau, ning dage I ’nseu la lei; achu guaka’nchume leine dagene achu tew’nring gai lau, zai achu ’nripat kai lau,

²makchai â, duilui gum ze penui ne achu chak’nsia gu, zai zukereutat ku lei, zai mî ne de achu lupatchi lak gu lei.

³Hei Tingwang a Rapeu gau, aize I ne tew gai ’ndizai â zai a ba ne tâtewmaube bam dizai â

⁴a kangpeu du mâ-kesiabe ne I peiruî gai ’ndizai â nune a teureipeu gu ze mâtâu hang ga ze ’nchi-chine I sut kai ’ndizai â,

⁵peize a teureipeu ne achu gua’nchu lau, zai pa ne achu pak’ntua le lau, zai kedei ge pa ne achu peize chaîchim gai ne lau, zai a keringbe je pa ne kemût zeu ge peize tuâ gai ne lau.

⁶Hei Tingwang gau, ning lumpumbe ne zuachu lau, a teureime penui râtabe peireige nang ne zuachulia lau; Hei a Rapeu gau, ’nrakchu lau; samrambe â nang ne die’ntip kai ’nde lei.

⁷Peize hezat leine ne ning dage zuawang’ndui lau; chi ka’nduibe peireige kehu ’mbe nang ne ’ntau lau.

⁸Tingwang ne hezat leine je samram lei; Hei Tingwang gau, I kapelingbe luigumbe gene achu samram gai lau, zai a dage ka’nzeibe bambe luigum ze achu samram gai lau.

⁹Hei nang â kapelingbe Rapeu, peize helungriaksiame gu kesiabe ze ga de lau; kane nang ziemmena ka’nningbe benai helung kakedakpeu, kapelingbe kau je nang ne teichu gai lau.

¹⁰A gu hinggei ze â Hera dage la lei, helung ge ka’nzeipeu je du tew’nringgaipeu zeu.

¹¹Hera â peling ne samrampeu lei, zai pa â nai’nsangne pe lunggailak luisui bambe Rapeu lei.

¹²Ziemmena ne helung-heliwang mak ti zai â, Hera ne pe gu hiazutkie kereu gu de lei; pe gu bai’mpi rîau’mbungring gai lu ze reu gai ’nde lei;

¹³tewchatrabe hereimerua ramme pa kedâ gai ’nde lei, hemitaube hetupie ramme ne pa kateleu lei.

¹⁴Pie le lau, helungriaksiabe kau ziemmena ne pe lungge mâ-kesiabe ’mpungpat la lei, zai mâ-tew’nsiagairabe hanggene pe lung ge reugit la lei, zai karasa dampat kai lei.

¹⁵Pa ne hûmkuiki teleu gai lu chize su’nchuk kai lei, zai chi hûmkuiki pa teleugaibe ge pa keu gai lei.

¹⁶Pe gu hejaîsit ze pe peireige helatwang kadai lei, zai pe gu katîmphibe tâ tewbe ze pe buang ge keu gai lei.

¹⁷Tingwang dage I a suiyibe liâ gai gu lei, pe tatew ka’nzeibe ziegeneu, zai Hulangpeu, Tingwang ji je leutew ze I toa gu lei.