Read Zeme Naga GETOABELEU 71 Bible Online

GETOABELEU 71 - Zeme Naga bible

GETOABELEU 71

¹Nang ge, Hei Tingwang, I wang ze ’nseu ka’nsui lei; achu mâdau du ’ngngam ze bam ra pei gai se lau!

²Ning gu kapelingbe gene achu lupat ze tew’nring gai lau; a lam ning kun ’ngngiakeu ze achu tew’nring gai lau!

³A hangge nang ne ka’nseube chutum, keriengdi peranchibe chang gai lau, achu tew’nring gai ra hangge zeu, nang â a gu tingchutum zai a gu keriengdi chang daseu.

⁴Achu meupat kai lau, Hei a Rapeu gau! helungriaksiame ba geneu, zai pelingmakme benai lungkatingrakme ne herak’ndibe geneu.

⁵Hei Tingwang gau, nang â I kaheguîbe bangpui de lei, I hena’ngka gene Hei Tingwang, nang â a gu I ’nnumtew bâm lei.

⁶Achu lungkeugaibe gene seu ze ning dage I ’ngngêu bam lei; a pui gu nebâm gene achu lupatpeu ze nang de lei. Ningchu I toa bam lei.

⁷Misonggame hangge achu â ningdaulakbe ’nchetkaibe chang lei; kane nang â I ka’nseube peranchibeki chang lei.

⁸A mui ge ningchu getoabe benai hengêutewbe ne tingnaimikpui tâluî puigit ze bam lei.

⁹I gechîng changdibe ting ge achu tuâpat kai se lau; a ran-gakeu dezai achu put kai se lau.

¹⁰A teureime ne achu dam lei, a keringbe lîmpieme mâ-laddeitew lei,

¹¹zai acheu sa ze, “Hera ne pechu sâu gai ’ndi de lei; gua’nchumie ze pechu nîm le lau, pechu lupat kai ra hang mî du ga lei,” ze kacheu de lei.

¹²Hei Hera gau, a dagene bam’ndeu se lau; Hei a Rapeu gau, achu ’ngngâ ra hangge kelua lau!

¹³Peize achu kesia’ndamgaime je â tew’ngngam gai, zai tew’ngga ne lau; achu tewhejam ra peume je â mâ-hang chakkaimakbe benai helêukeudibe zene peize penui ju ruichim ne lau.

¹⁴Kane I â heguîkua bam gu lei, zai ningchu I toa bam gu rei lei.

¹⁵Ning gu kapelingbe tatew ramme, zai ning gu tewka’nringbe tatew rasam ramme ze naimikpui tâluî I sa bam lei, chiramme riak â I gechîbe suadu kie’ngkeu lei.

¹⁶Tingwang Hera tatew kedibe ramme gene I zuawang gu lei, ning gu kapelingbe, ning gu je runne I toa gu lei.

¹⁷Hei Hera gau, hena’ngka gene achu nang ne getei gai bei de lei, zai ning tatew ningdaulakbe ramme deze I paurua lamui rei lei.

¹⁸Chidaze chîngkeu di ze tamzing puakbe riâ chang leusedu, Hei Hera gau, achu put kai se lau, Ning gu tâtewchibe ze rehei chudairame dage I peurua gai mak tâneu. Ning gu rezie benai

¹⁹ning gu kapelingbe ze Hei Hera gau, ting kehube chuchang de lei. Nang mâ tâ kedibe ramme tewgaipeu, Hei Hera gau, nang gumbe châu la lau?

²⁰Mi duânggaka’nteube ngau ra nang achu tewgaipeu ne achu tew’nrak kai dai gu lei; kedei chukbe lung gene nang ne achu zuchu gai dai gu lei.

²¹Nang ne a ji tew’ndibi-bi gai gu lei, achu tum gai dai gu lei.

²²Ning gu lungsangtewbe hang ziegene ’nrabung ne du ningchu I toa gu lei, Hei a Rapeu gau; Hei Israelme gu Ka’nchipeu gau, ’nrabung ne ningchu suang ze I leutew gu lei.

²³Ning dage getoabe leu ramme I tew dezai, hesuiyibe ne a mui ne I ’nrung gu lei; zai nang ne meupatkai’ndibe a keringbe ne du hesuiyibe ne ’nrung gu lei.

²⁴A leiria ne ning gu ka’ngngâbe kapelingbe deze tingnaimikpui tâluî I sa bam gu lei, achu tewhejam gai ra peume je tew’ngngam ze tewhelêugaibeibe ziegeneu.