Read Zeme Naga GETOABELEU 72 Bible Online

GETOABELEU 72 - Zeme Naga bible

GETOABELEU 72

¹Hei Hera gau, ning gu ka’nzeibe ze heguang je pei gai lau, zai ning gu kapelingbe ze heguang na ’mpeumi dage pei gai lau!

²Peize pa ne ning gu ziemmename je kapelingbe ne samram lau, zai ning gu kelaksiame je ka’nzeibe ne samram gai lau!

³Peize kedeiloa ramme ne ziemmename hangge lungka’ntuabe pei lau, zai deicheiloa ramme du kapelingbe ne peize pui lau!

⁴Ziemmena ruage kelaksiame du peize pa ne sapdang be lau, zai kegame je peize ripatkaibe pei be lau, kategabe kau je â peize tewhitruai gai ne lau!

⁵Rehei leine ge tingnaimik bam tâne, zai hekêu lerba bam tâne peize pa ring bam lau.

⁶Peize pa ne timpei chiaplube ge tingruikeube gum ze chang lau, tingsim zene kedei tewchimgaibe gum zeu!

⁷Pe gu ringting ge peize kapelingbe pungpat ze bam lau, zai peize desieyibe teiwang lau, hekêu ga mak tâneu!

⁸Peize pa â sungkling gene sungkling chang ze, zai Euphrates geuki gene kedeimik ramme chang ze samrambe rezie tei bam lau!

⁹Peize pe teureime ne pe suage kukdungkeu ze bam lau, zai peize pe teureime ne timbunmoîne ’nniak ze bam lau!

¹⁰Peize Tarshisme gu heguang benai duiluaka’nggua ramme ne pechu ’mpuâ pei ze bam lau, peize Sheba gu heguangme benai Sheba ne pechu kela ramme pei ze bam lau!

¹¹Peize heguangme leine pe suage keikeu kam lau, heram leine ne peize pechu ’nggua lau!

¹²Kegapeu ne pechu kû gai dege pa ne pechu lupat kai bei, zai kelaksiame benai ’ngngâgairagabe kau je pa ne lupat kai bei lei.

¹³Pa ne peran-game benai kegame je ’nggia bei lei, zai kegame pum keringbe je tew’nringpat kai bei lei.

¹⁴Kategame benai katîmphime dagene pa ne penui keringbe ’nripat kai bei lei; zai pe mikngau ge penui jai â pemîhung-kadesang lei.

¹⁵Zai peize pechu â ringtie bam lau, peize Sheba gu gechâk pechu pei lau! peize pe hangge kellum ze kiegaihâ bam lau, zai tingnaimikpui tâluî ’nnamgaibe pe hang peize kie gai bam lau.

¹⁶Heram lungge hemeu ramme peize puigit bam lau; zai kedeiloa’ntûm ramme ge peize kengaksuai bam lau; zai perachî ze Lebanon gum ze peize bam lau; peningkâm gu timpei ramme gum ze, peize namdi ramme gene ziemmena ramme chuangpuigit ze pat lau!

¹⁷Peize pe ji â bam bam lau, tingnaimik bam tâne pe ji kedibe ze peize di bam lau! Peize pa gene ziemmename penui runne penui hang yi ze bam lau, pezat leine ne pechu helungkatemipeu ze peize ku lau!

¹⁸Israelme Rapeu, Tingwang je peize yi lau, ningdaulakbe tâ ramme ze â pe runne tewpeu zeu.

¹⁹Betingbeta pe ji pengêudibe peize toa bam lau; peize pa pengêudibe ze kedeirei leine ge puigit ze bam lau! Amen, Amen.

²⁰Jessibe na Dabidbe mâ-gekietewbe ramme â tud kai de lei.