Read Zeme Naga GETOABELEU 73 Bible Online

GETOABELEU 73 - Zeme Naga bible

GETOABELEU 73

¹Pelingsing ze Hera â ka’nzeime hang yi lei, penui lung ge ka’nchime hangge zeu.

²Kane I â a pî kâutena la de lei, a pikiâm ramme du kaukeutena la de lei.

³Gechîrettewme je I â ngau’nchie ze bam de lei, helungriaksiame pung-ze-sabe I ngau lu dege ai.

⁴Penui â keteu-keneube ramme du ga lei; penui pum ramme du hepumsakyi zai ’ndiaupiau ze bam lei.

⁵Miramme gum ze penui â penui duânggabe du bamsua mak lei; miramme gum ze herarît du deîtau mak lei.

⁶Chipauziegene gechîrettewbe zene penui gu heteuria chang ze bam lei; katîmphibe zene penui paî gum ze bâ ze bam lei.

⁷Penui mikkûm ramme â penui dit ne pumsum bam lei, penui lung ge kemieliangtewbe ne pui’nniâmba ze bam lei.

⁸Penui sakerai ze ’nzûmka’nnabe sam sa lei; penui ditpuîbung ze kategabe ne kakedung lei.

⁹Penui mui ne tingsung kedibe je sa’nsia, zai penui leiria ne kedeirei kengaktui lei.

¹⁰Chipauziegene ziemmename ’nreiwang ze penui je toa lei; zai penui dage mâ de kesiabe ngaupat mak lei.

¹¹Dadege penui ne, “’Ndaigum ze Hera chî le ra lau? Hulangpeu dage mâ-gechîbe la semei?” ze kacheu de lei.

¹²Pie le lau, aime ramme ze â helungriaksiame de lei; temichai ze bam bam lei, zai penui â kelakyibi-bi bam lei.

¹³’Ntakûne ze I a lung teleu’nchi ze bam lei, zai sa’nsia mak ra a ba ka’ntik te lei.

¹⁴Tingnaimikpui tâluî achu tewkeleulia ze bam lei, zai hechua ’nsangne tewsâ ze bam lei.

¹⁵I ne, “Aigum ze sa gu lei,” ze acheu sa gai dizai â, I â ning chaname rehei hangge tâumakbe kau chang du de lei.

¹⁶Kane aize ’ndaigum ze ’nningchi le ra mei be ’nning gai dege â, a hangge keleibe tâ hangge I ngaupat kai lei,

¹⁷Hera gu kakellumbeki ka’nchibe ge I zuagut kai mak tânege ai; chipau chângge â penui tudkairabe I ngaupat ti de lei.

¹⁸Pelingsing ze nang ne penui je ka’nneibe bâm ramme ge kai bei de lei; nang ne penui kau’ngga de ra hang tew gai bei de lei.

¹⁹’Ndaigum ze penui je luakatne tew’nsia kam ’ndi se lau, mi hingka-desangbe ramme ne penui je biaktua nan zeu!

²⁰Mige jei’ngkiachube chângge mi mang gum ze, Tingwang gau, nang ’nrakpat dai dezai, penui miê teiliabe ramme ze nang ngau’nna gu lei.

²¹A lung ze chaikedaigaidibe luage, a lung siagai’ndibe luage,

²²I â kemiebe kau, zai mâ-hî chimakbe kau chang di de lei, I â hekaubena gum ze ning hangge chang di de lei.

²³Acheuleusedu I â ning dage bam bam lei; Nang ne a hezat’mbia ba ze tei’nggim bei de lei.

²⁴Nang geteiliaka’mmibe zene nang ne achu nguatat bei de lei, zai bechâng dezai du nang ne pengêudibe ge achu ngua gai gu lei.

²⁵Châu je tinggîm ge I dau ra lau, nang zangno? Zai kedei ge ningchu sâu ze kêdabe I ka’nchâbe ga lei.

²⁶A gu hemeipum benai a lung â daulakbe chang leu gu lei, kane betingbeta hangge Hera â a lung ranchibe benai a gu hedam de lei.

²⁷Ni, ning dagene deutau ze bamdime leine â, ga gai gu lei; ningchu karasatewme je â nang ne tewtud kai bei lei.

²⁸Kane a hangge â Hera dage wangka’nnabe yi lei; Tingwang Hera dage a ’mbaibâm hang I ne tew gai lu de lei, chidezai ning tatew ramme leine I salia be ra hangge zeu.