Read Zeme Naga GETOABELEU 74 Bible Online

GETOABELEU 74 - Zeme Naga bible

GETOABELEU 74

¹Hei Hera gau, ’ndaitew ze betingbeta hangge nang anui je tuâpat ’ndi lau? ’Ndaitew ze ning gu melitaning gu meli ramme je ning lumpumbe mika ne chu lau?

²Ning gume wangka’nduime bau je chibam lau, ’ndâ gene nang kelânglume bau jeu, chi nang ne ning heu lurame kiria hangge ’nripatkai’ndime jeu! Nang bambe Zaion Loa je chibam lau.

³Betingbeta siakamderabe ge ning pikiâm ramme kiam’nrik kai lau; pebâm ka’nchibe lungge merua leine hereime ne tew’nsia kam de lei!

⁴Ning teureime ne ning gu ka’nchibe bâm zuilung ge ’nrunggetie gai de lei; penui gu hepiepaî ne ka’nchetbe hang sum gai la de lei.

⁵Zuagutbe kemuiki ’nreibe ge heching pichaîkang ze ’nrei ne penui ne siaptua ’ndi lei.

⁶Chidadege chipau bâm gu heching bepuâ teleuzunlube leine desiâmrei benai tediak ramme zene penui ne tewkau kam ’ndi lei.

⁷Ning gu pebâm ka’nchibe ge penui ne hemi’ntau gai bei de lei; ning ji bam bambe bâm ze penui ne kedei riâ tewhebâ kam gai ’ndi de lei.

⁸Penui runne penui je acheu sa de lei, “Anui ne penui je naî kam gu lei,” zeu; heram lungge Hera je kahedaube bâm leine penui ne rû kam ’ndi de lei.

⁹Anui â anui gu ka’nchetbe ramme ngau mak lei; kemeume mige du ’ngga lei, zai ’ndaitiege sia bam de ra kau mei be anui ruage mî de gechîbe kau ga lei.

¹⁰’Ndaitiege Hei Hera gau, mi teureime ne sakerai bam ra lau? Mi teureime ne betingbeta hangge ning ji ze sahebâ bam ra mei?

¹¹’Ndaitew ze ning ba ze ’ndun-gut te ra lau, ’ndaitew ze ning ba hezat’mbia ze ning ga ge kai bam lau?

¹²Chigum sedu Hera a Wangpeu â keraîbe ting gene du bam bam lei, kedeirei zuilung ge tewka’nringbe tâ tew zeu.

¹³Nang ne ning rimchi gene sungkling ze kuisapedak kai bei de lei; nang ne hedui lung gene nâmtegêng peî ramme kedeîniang gai bei de lei.

¹⁴Nang ne Lebiathan peî ramme kedeîniang gai bei de lei, nang ne pechu hênamkang gu hekaubena ramme hetak hang pei gai bei de lei.

¹⁵Nang ne hedui-depin ramme benai ’nggeuruak ramme tei’nsuk kai bei de lei; nang ne hedui luabambe geuki ramme ze tewchangku gai bei de lei.

¹⁶Kebabe ting ze ning gu lei, kemuîbe ting ze du ning gu lei; nang ne hegi ramme benai naimik ze penui bâm-bâm ge kai bei de lei.

¹⁷Nang ne kedei ’nrai ramme leine periâ hang die gai bei de lei, nang ne kepuakting benai hekarâting hang tew gai bei de lei.

¹⁸Aize chibam lau, Hei Tingwang gau, ’ndaigum ze hereime ne kakerai mei be zeu, zai lung’nchimakbe ziemmename ne ning ji sakakerai mei be zeu.

¹⁹Ning gu temaune gu keringbe je hekaubena dage peipat kai se lau; ning gu kelaksiame gu keringbe pum sapbe ze betingbeta ’ngngaî se lau.

²⁰Ning gu samhatkaibe ze chitei bam lau; heram kemuîbe bâm ramme ge katîmphime ne lungpui kam ’nde lei.

²¹Kategabe lieme je tew’ngngam gai ra pei se lau; kelaksiame benai kegame ne peize ning ji toa lau.

²²Zuachu lau, Hei Hera gau, ning sam ze salia’mmi gai lau; helung ’nchimakme ne ’ndaigum ze naimikpui tâluî ning ji sakerai bam mei be ze chibam lau!

²³Ning teureime gu kakebiengbe ze ’ngngaî se lau, zai ningchu ka’nggime ’nrungkakeleube kuâ kehu ’mbe chubambe zeu.