Read Zeme Naga GETOABELEU 75 Bible Online

GETOABELEU 75 - Zeme Naga bible

GETOABELEU 75

¹Ning dage anui suiyibe sam pau gai lei, Hei Hera gau; anui suiyibe sam pau gai lei; ning ji â anui ne kû ze ning tatew ningdaulakbe ramme paurua de lei.

²Beting diegailube hî geze ka’nzeibe gene I samram gai gu lei.

³Kedei zai pelung ge kelungme leine sapkelippin bambe luage, pe gu kechia’ndi ramme sum’ntip ze teika’nsappeu â I de lei.

⁴I ne gechîrettewme je, “Gechîrattew se lau,” kacheu de lei. I ne helungriaksiabe je, “Ningnui gu mâkie teigetuachu se lau,

⁵ningnui gu mâkie teigetuachu’ngngu se lau, zai duîzuttewbe guang hetiêriebe ne ’mpau se lau,” ze kacheu de lei.

⁶Teigetuachugaibe ze â naimikpat ’mbia ne du mak, zai naimik keugaibe ’mbia ne du mak, zai hênamkang gene wangbe du mak lei;

⁷kane samrambe teichugaipeu â Hera de lei, hangkat je teikeu gai, zai kêdapeu je teigetuachu gai bei de lei.

⁸Tingwang ba ge hepiak lamui lei, wain pehûptarumbe kebut’mmilube zeu; zai chigene pa ne ruî gai lei, zai kedeirei ge helungriaksiame leine ne chize sak’nzâukerut kai ’ndu lei.

⁹Kane I â betingbeta a suiyi’nta bam gu lei, getoabe leu tew ze Jakobbe Rapeu je I toa gu lei.

¹⁰Helungriaksiame leine gu mâkie ramme pa ne duatua gu lei, kane ziemmena kapelingme gu mâkie ramme â teichu’ngngu gai gu lei.