Read Zeme Naga GETOABELEU 76 Bible Online

GETOABELEU 76 - Zeme Naga bible

GETOABELEU 76

¹Juda ge Hera je chîtau kam de lei, Israel ge pe ji disang-di la lei.

²Pa bambe bâm ze Salem ge tew gai la lei, pa bambe bâm Zaion gezeu.

³Chige pa ne penui gu bai’mpitu ramme kepitpatbe, hinggei, hiazutkie zai hereimerua ramme tew’nsia gai bei de lei.

⁴Nang â pengêudi-desang ze la lei, betingbeta bambambe deiloa ramme suane â, nang kaheguangbe â di’nteu lei.

⁵Gekuube lung pungme gu herei gene merua sutwangbe (hereichâ) ramme ze â gâuwaktua ’ndi de lei; penui â jeikela gai gene jeikeuzut ti de lei; herei gu ziemmename leine penui bahuâ kaichi ta di de lei.

⁶Ning gu ka’ngngiambe ge, Hei Jakobbe Rapeu gau, hekunchingchuame benai hekun je tewmang gai ’ndi de lei.

⁷Kane mi hingrabe ze â ning runne de lei! Châu ning masuage sapchi ra lau, ning lumpum patkaibe luage zeu?

⁸Tingkehu ’mbene nang ne samrambe kuâ sapat kai bei de lei; kedeirei ne hing di ze rim bam de lei,

⁹kedeirei ge kategabe lieme leine je tew’nring gai ra, Hera ne samrambe tâ teichu gai ra zuachube luage zeu.

¹⁰Pelingsing ze ziemmename ne penui lumpumbe ze ningchu toa ra chang gai sing gu lei; helumpumrabe pum mak ze ’nsakkai’ndibe ze â nang ne pung ’ndu lei.

¹¹Tingwang ningnui Rapeu dage ningnui gu mâ-kadeseube tew lau, zai chiramme tew’nsang gai lau; peize pechu bamguame leine ne kela ramme teiwang lau, haimena ne hing ze bamrabepeu,

¹²heguangname maning ramme lutuapeu, kedeirei heguangme ne hingka-desangpeu dage zeu.