Read Zeme Naga GETOABELEU 77 Bible Online

GETOABELEU 77 - Zeme Naga bible

GETOABELEU 77

¹Hera je I kû’nchi gai de lei, pa ne a kuâ peize seu le ra hang kû’nchi gai de lei.

²A duânggabe mai ge Tingwang je I peu de lei; tingmuî ge leikeu mak ze a ba getua bam de lei; a lung tewhegeitenai gai ra hangge a keringbe ne pheu meu lei.

³I ne Hera je ’nning ze huaipun gai de lei; I ’nninghekuî gai dege a lungran-gawang de lei.

⁴Nang ne a mikkûm gekapkeu mak ra tei bam lei; a duângga-kadesangbe ne I a sam sachi ta di de lei.

⁵Tingtie’ngka gu I ’nning gai ze patingkum ’ndâ tattibe ramme ze I ’nningdau de lei.

⁶Mâ-mâ kuâ seuyibe helî ramme tingmuîzeu ge a lung ge ’nningdau gai de lei; I mâ-’nninghekuî gai de lei, zai a lung ge mâ-’nning’nchukduktat ti ze:

⁷“Betingbeta hangge Tingwang ne achu tuâpat kai nan ze mâtew-tewsedu achu ’nchâ gai dai ta ra de mei?

⁸Pe gu hungka’ntipbe ze betingbeta hangge sau gai de ra de mei? Pa samriagaibe ramme sauzut kai de ra de mei?

⁹Ngau’nggia gai ra Hera ne chita di de mei? Pe râtabe gene pa hung ta ra de mei?” ze acheu gai de lei.

¹⁰Chidadege I ne, “Hulangpeu ne pa hezat’mbia ba ze tewkeli nan ze I a duângga de lei,” ze kacheu de lei.

¹¹Tingwang gu tâtewbe ramme ze I ’nningdau bam gu lei; eu lei, ’ndâ gu mi ningdaulakbe ramme ning gu ze I chî bam gu lei.

¹²Ning tatew leine peireige I ’nninghekuî gai gu lei, zai nang tâtewbe kedibe ramme peireige I ’nning ze hezêu gai gu lei.

¹³Hei Hera gau, ning gu ’mpuî â ’nchi lei. Anui Rapeu gum ze kedibe kau ’ndaikau râ la lau?

¹⁴Nang â mi ningdaulakbe ramme tewbe Hera lei, zai hezat leine ruage ning ranchi teiliapeu zeu.

¹⁵Nang ne ning ba ranchi ne ning gu ziemmename je ’nripat kai lei, Jakobbe name benai Josepbe name bau jeu.

¹⁶Hedui ramme ningchu ngau lu dege Hei Hera gau, hedui ramme ne ningchu ngau lu dege penui hing di de lei, eu lei, hedui chukbe ne kakedun de lei.

¹⁷Kemâu ramme ne hedui ruîpat te lei; tinggîm piehang ngaube zene tingcheibe kuâ pei gai lei; ning gu bai’mpitu ramme pemik ’nsangne ge kepitrua lei.

¹⁸Ning gu hegikeube tingcheibe kuâ ze â, tingkai guika’nruibe ge bam lei; ning gu tingkakepitbe ramme zene kedeirei batui ra tew gai lei; kedeirei kedun ze kakechuî de lei.

¹⁹Ning gu ’mpuî â sungkling gene tatkapela lei, ning gu ’mpuîrikki â hedui kedibe gene tatkapela lei; chigumsedu ning pîpa-miê ramme â ngau mak lei.

²⁰Melidung gum ze ning gu ziemmena je nang ne Mosabe benai Aaronbe ba gene nguatat bei de lei.