Read Zeme Naga GETOABELEU 78 Bible Online

GETOABELEU 78 - Zeme Naga bible

GETOABELEU 78

¹Hei a gu ziemmename gau, a gu mâ-geteiliabe kuâ ge ningnui ’ngking’mmi gai lau; a mui gene sam zuapatbe ramme deze ningnui kun ’ndualie gai lau!

²A mui ’ngkakpat ze sam’nda ne I sa gai gu lei; ’ndâ gu sam chukbe ramme I salia gai gu lei,

³anui seube benai gechîbe, anui pau-paime ne anui dage rangliabe ramme zeu.

⁴Penui chaname ramme dagene chiramme anui tei’mbia ra mak lei, kane rehei churame dage salia gu lei, Tingwang gu pengêudibe tatew ramme, zai pa tâtewchibe, zai ningdaulakbe zat ramme pa tewgai’ndibe ramme zeu.

⁵Pa ne Jakobbe dage samdiegai’ndibe tew’ntip kai de lei, zai Israelme dage hingde pei gai de lei, pa ne anui pau-paime dage penui chaname je getei ra hang samdiegaibeibe zeu;

⁶chidezai rehei piakeudairame ne chiramme chî sing le ra, zai chuna lungkeumakme napoine ramme ne zuachu ze penui chaname ramme je chiramme salia le ra hangge zeu,

⁷chidezai Hera ge penui kaheguîbe bam ra, zai Hera gu tatew ramme deze ’ngngaî mak ze, kane pe gu hingde ramme rei’mmi le ra hangge zeu;

⁸zai chidezai penui pau-paime, helungchibe benai kategabe reheime, penui lung ’ntip mak ze bamme, zai penui lung ka’nningbe du Hera dage hezuâmakme gum ze penui â bam mak ra hangge zeu.

⁹Ephraimbe name â bai’mpitu tei lu herei ka’nggibe mai ge helat dai di de lei.

¹⁰Penui â Hera gu samhatkaibe tei mak lei, zai pe gu hingde luigum ze du tatnei mak lei.

¹¹Pa ne tâtewgai’ndibe, zai pa ne tâningdaulakbe teiliabe ramme penui â ’ngngaî kam ’ndi de lei.

¹²Penui pau-paime mikngau gene ningdaulakbe ramme Ijipram lungge Zoan kâm ge tew gai de lei.

¹³Pa ne sungkling ze bêupang gai lu penui je chige tatpela ra pei bei de lei, zai mâ-bienamgaibe gum ze hedui ramme sapchu ra tew gai bei de lei.

¹⁴Kebabe ting ge pa ne penui je kemâu ne nguatat, zai kemuîbe ting tâluî ge keleu babe ne nguatat lei.

¹⁵Hênamchangberam ge pa ne tingchutum ramme tewpâng gai bei de lei, zai hezai chukbe gene sak gum ze kegeuga ze sak ra penui je pei bei de lei.

¹⁶Pa ne ’nggeuterak ramme tingchutum gene pat ra tew gai bei de lei, zai ’nggeuki ramme gum ze hedui lua ra tew gai bei de lei.

¹⁷Chigumsedu pe peireige penui hemui gai suâ ze bam lei, hênamchangbe ge Hulangpeu je ’nggi zeu.

¹⁸Penui lung gene Hera je kakedak te lei, penui teunei-kadesangbe gesutlakbe hetak ze penui ’nchi-chine kie zeu.

¹⁹Penui ne Hera je sa’nsia ze, “Hênamchangberam ge Hera ne mâ-teu ra ’ngguapat dui de lau?

²⁰Pa ne tingchutum lak kai bei hedui puakpat, zai ’nggeuterak ramme lua’nniâmba pat lei. Pa du tingku peichi duî se mei? Zai pe gu ziemmename hangge hemei telapat dui se mei?” ze penui kacheu de lei.

²¹Chipauziegene, Tingwang seu lu dege, pe lumpum-desang di de lei; Jakobbe peireige hemi’ndetpat te lei, Israel peireige pe râtachu di de lei;

²²Hera dage penui keneibe ’ngga, zai pe gu tewka’nringbe rezie deze penui ’nnumtewmakbe ziegeneu.

²³Chigumleusede pa ne, kehu ’mbe tinggîm piehang ngaube je samdie gai bei de lei, zai tinggîm ’ngkam ramme lat kai bei de lei;

²⁴zai penui teu ra pa ne penui peireige manna ruîkeu ra tew gai bei de lei, zai tinggîm gu mâ-hîmlei pa ne penui je pei bei de lei.

²⁵Angelme gu tingku ziemmename ne teu de lei; pa ne hetak kegeuga ze penui dage lang gai bei de lei.

²⁶Tingbia ’mbia gu tingkai tingsung kedibe ge gui ra pa ne tew gai bei de lei, zai pe gu rezie zene tingrun ’mbia gu tingkai ze pa ne nguapat kai bei de lei;

²⁷’mbuimoîne gum ze penui peireige hemei ruîkeu ra pa ne tew gai bei de lei, sungkling gu hegit gum ze keliambe ’nruine ramme ruîkeu ra tew gai bei de lei;

²⁸pa ne penui gu tejeîki zuilung ge kêugut kai ra tew gai bei de lei, penui bambe hia-hiage zeu.

²⁹Zai penui teu lu ’nggeugit bam de lei, penui teunei-kadesangbe gesutlakbe zat pa ne penui je pei bei dadegeu.

³⁰Kane penui teunei-kadesangbe gesutlakbe zat penui teu’nggarai gai makge penui muiki ge tak bambe luagene,

³¹penui peireige Hera lumpum ’ndetpat ze, penui ruage peranchilangme je pa ne tewchat ’ndi de lei, zai Israelme gu herei hang kelânglume je pa ne tewkau kam gai bei de lei.

³²Aigumbe leine wangchang bei sedu penui hemuitew’nduâ bam gerei lei; pe gu ’nningdaulakbe tâ ramme tewlia bei sedu penui ’nnum’mmi mak lei.

³³Chidadege pa ne penui gu ringting ze hechuilu gum ze ga gai de ra tew gai bei de lei, zai penui tingkum ramme ze kehingbe ge bam ra tew gai bei de lei.

³⁴Pa ne penui je tewchat kai bei dege â, pechu penui peu di de lei; penui lung heliwang dai ze Hera ge penui lungchi kai ze peu kadai de lei.

³⁵Hera ze penui gu tingchutum lei be penui ’nningdau de lei, Hera Hulangpeu penui je ripatpeu jeu.

³⁶Kane penui, penui mui ne pechu pe ruâgetoa ze bam lei; penui leiria ne pechu damkemak ze bam lei.

³⁷Penui lung pe dage bam’ntiprip ze bam mak lei; pe gu samhatkaibe ge penui â bamtâu mak lei.

³⁸Chigum bei leusedu pa â ngau’nggia-kadesang lei, penui gu hemui-helut ze lun gai bei de lei, zai penui je tew’nsia gai mak tai lei; pa ne pe lumpum gesut kai’nzie ze bam lei, zai pe laîpat ze pe lumpum gai mak lei.

³⁹Penui â hemeipum sâng hemeipum runne lei be pa chî bam lei, tingkai guitattibe ze guiwang dai mak lei.

⁴⁰Hênamchangberam ge luadaikie penui pechu tingkang, zai hênamkang ge pe lung tewkahereube nung zeu!

⁴¹Penui â pechu kedak dai, kedak dai ze bam lei, zai Israelme gu ’Nchînglangpeu je tâ’ngku ze bam lei.

⁴²Pa tâtewchibe rezie ze penui lung ge chitei bam mak lei, zai penui je pa ne heteureime dagene ripatkaibe mai gu ze du chitei bam mak lei;

⁴³Ijip ge pe gu dak ka’nchetbe ramme benai Zoan kâm ge pe gu tâningdaulakbe ramme pa tewgaibe mai gezeu.

⁴⁴Pa ne penui gu ’nggeuki ramme ze hejai chang ra tew gai bei de lei, chidezai penui gu ’nggeuterak dui sakchilak ra hangge zeu.

⁴⁵Pa ne penui ruage temaine dung lang gai bei de lei, penui je tupteube ramme zeu, zai hegau ramme lang gai bei de lei, penui je tewka’nsiabe ramme zeu.

⁴⁶Pa ne penui gu hemeu ramme ze tinggûmbe ramme hangge pei gai bei de lei, zai penui tâtewpatkaibe rachî ze tîngkau ramme hangge pei gai bei de lei.

⁴⁷Desak ne penui gu grepchî hiâm ramme tuâ’nsia kam ’ndi de lei, zai penui gu ’mbeuchîbang ramme zedu kebun ne ’nda’nsia kam ’ndi de lei.

⁴⁸Pa ne penui gu kaurui ramme je desak ne tew’nsia ra pei gai bei de lei, zai penui gu melidung ramme je hegi ne tuâchat ra pei gai bei de lei.

⁴⁹Pa ne penui peireige pe râtabe, pe lumpumbe zai mi duânggabe ’mpat kai ra mâ-tewka’nsiame angelme bau je lang gai bei de lei.

⁵⁰Pa pe râtarabe hang pe runne ’mpuî teleu gai de lei; pa ne penui je tewchat’nsak kai mak lei, kane penui je herarît gene chai ra pei gai bei de lei.

⁵¹Ijip ge meraibe na leine je pa ne tewchat ’ndi de lei, Hambe gu hetiampaîki ramme ge penui lungkeuraibe na ramme zeu.

⁵²Chipau chângge meli je gum ze pa ne penui je nguapat kai bei de lei, zai kauruidung je gum ze pa ne penui je hênamkang ge nguatat kai de lei.

⁵³Pa ne tinggeuzun ze penui je nguapat kai bei de lei, penui mâ de kehingbe tew mak ra hangge zeu; kane sungkling gene penui teureime bau â kehakchat kam ’ndi de lei.

⁵⁴Dadege pa ne penui je pe gu ka’nchibe heram ge nguawang gai bei de lei, pa hezat’mbia ba ne duîlube deiloa gezeu.

⁵⁵Pa ne heramzatme je penui sua ’mbe guapat kai bei de lei; chime gu heram ge pa ne heram ’nram ra pei bei de lei, zai Israelme kibaume je penui gu hetiamki ge lung ra pei gai bei de lei.

⁵⁶Chigumsedu Hunglangpeu Hera peireige penui kedak ze ’nggi ze bam lei, zai pe gu hingde rawdiakkaibe ramme penui a tei mak lei,

⁵⁷kane ’nnuktat ze penui peume gum ze penui choâsiabe gene tatew ze lung di de lei; kechoabe bai’mpi gum ze penui leksek bam de lei.

⁵⁸Penui gu kehube bâm ramme tew’nsap ze pe rata tew ze bam de lei; penui gu mâ-luîtewlube ramme zene penui ne pa hemimeu ra tew gai bei de lei.

⁵⁹Hera seuchang lu dege, pe lumpum-desang di de lei, dadege â Israelme je pa ne tuâpat ’ndi de lei.

⁶⁰Shilo ge pa bambe bâm ze sâu gai ’ndi de lei, ziemmename ruage pa ngua-bambe bâm hetiamki zeu,

⁶¹zai pe gu tâtewchibe ze bangnam gai ne ra hangge peipat kai bei de lei, zai pe gu pengêudibe ze heteureime ba ge pei gai bei de lei.

⁶²Pe gu ziemmename je hiazutkie mui ge pei gai bei de lei, zai pa kelânglume peireige pe lumpum tewlia bei de lei.

⁶³Penui gu rehangme bau je hemi ne rû ’ndi de lei, zai penui gu heleume bau hangge kahegiabe leu ’ngga di de lei.

⁶⁴Penui gu tingkume ze hiazutkie gene kâu kam di de lei, zai penui gu kemîpuime ne heu ze hap kai mak tai lei.

⁶⁵Chidadege â jei’ngkiâchu gum ze Tingwang chu de lei, wain sak lu ze peranchibe ziemmena ka’nrungbe gum ze ka’nrung de lei.

⁶⁶Dadege pe teureime je pa ne guatua gai bei de lei; penui je betingbeta ’ngngam bam ra kai bei de lei.

⁶⁷Pa ne Josepbe gu hetiamki tuâpat kai de lei, Ephraimme kiria je pa ne kelâng gai mak tai de lei;

⁶⁸kane Juda kiria je pa ne kelâng lu lei, Zaion loa, pa hungbe jeu.

⁶⁹Tingsung kedibe kehube gum ze pe gu kakellumbeki tew gai bei de lei, kedei betingbeta hangge sum’ntip kai’ndibe gum ze, pa ne sum’ntip kai bei de lei.

⁷⁰Pe guâ ka’ngguapeu Dabidbe je pa ne kelâng gai de lei, zai meli rielung gene pechu ngua ’ndi de lei;

⁷¹melipui ramme je pa reîbambe gene pa ne pechu nguawang gai de lei, pe gu ziemmena, Jakobbe gu melireîpeu chang ra, pe gu kelânglume, Israelme gu melireîpeu chang ra hangge zeu.

⁷²Helung ka’nzeibe gene penui je pa ne reî bei de lei, zai mâ-tewchibe ba ne penui je ngua bei de lei.