Read Zeme Naga GETOABELEU 79 Bible Online

GETOABELEU 79 - Zeme Naga bible

GETOABELEU 79

¹Hei Hera gau, Jentailme ning gu heram ge wang la de lei; ning gu kellumki ka’nchibe ze penui ne tewhebâ gai ’nde lei; penui ne Jerusalem tew’nsia ’nde lei.

²Penui ne ning guâ ka’ngguame pum ramme, kehuruî ramme hetak hang pei ’nde lei, ning gu ka’nchime pum kedei ge hekaubena ramme dage pei gai ’nde lei.

³Penui jai ze hedui gum ze Jerusalem ge penui ne ruîguâ gai lei, zai penui je ritbai ra hang mî de ga tai de lei.

⁴Anui â namdâtewme dagene mi ka’ngngambe chang di de lei, anui je tumguâme ne kehi ze katelia de lei.

⁵’Ndaitiege ra lau, Hei Tingwang gau? Betingbeta ning râta bam ra de mei? Ning lunggailakbe ning râtabe ze hemi gum ze tau bam ra de mei?

⁶Ningchu chimakbe heramzatme peireige ning râtabe ze ruîpat kai be lau, zai ning ji kûchumakbe heguangram ramme peireige ruîpat kai be lau!

⁷Penui ne Jakobbe je tew’ngga ’ndi de lei, zai pa kelungbe bâm ze gua’mpiezîng gai ’ndi de lei.

⁸Anui pau-paime gu hemui-helut ramme ze anui peireige chibam se lau, anui deu hang yi ra ning gu ngauka’nggiabe peize wang kelua zu lau, anui je tewhelêu-desang gai bei la de lei.

⁹Anui je ’ngngâ gai lau, Hei Hera anui gu tewka’nringbe bangpui gau, ning ji ngeudirabe hangge neu; anui je lupat kai lau, zai anui gu hemui ramme lun gai lau, ning ji ziegeneu.

¹⁰’Ndaitew ze heramzatme ne, “Penui Rapeu ’ndaige la lau?” ze acheu sa ra lau? Ning guâ ka’ngguame jai luapatkai’ndibe kûm ruîbe ze peize anui mikngau ge heramzatme ruage chîpat lau!

¹¹Kebangme huaibe kuâ peize ning suage wangchang lau; ning gu tâtewchibe kedibe luigum ze chaikeu ra tewme je ’nzuakpat kai dai lau!

¹²Anui hiage bamme je bak sena penui ga ge pei gai dai be lau, Hei Tingwang gau, anui je penui ne teihenuitewbe zat ramme zeu!

¹³Chidezai anui ning gu ziemmename, ning gu melitaning gu melidung chang ze bamme, anui ne betingbeta ning dage hesuiyibe sam pau gai bam gu lei; rehei gene chu ze rehei ’nsangne ge ningchu anui toa bam gu lei.